Өнер ұжымының өрісі

Жарты ғасырлық жылнамасын тойлап отырған өнер ұжы­мының құрамына түрлі жанрдағы бірнеше шығармашылық ұжым кіреді. Олар – Дәулеткерей атын­­дағы қазақ халық аспаптар оркестрі, «Орал сазы» фоль­клорлық-этнографиялық ансам­блі, «Назерке» халықтық би ансамблі, «Классика» камералық ансамблі, «Орда» аспаптық трио­сы, «Ән қанатында» эстра­далық ансамблі. Бұдан бөлек жекелеген дәстүрлі және эстра­далық әншілер, күйшілер, жоғарыда аталған ұжымдардың көркемдік жетекшілері, дирижерлары, балетмейстері, режиссер, дыбыс режиссері мен операторы, суретші, шығар­машылық ұжымның жұмысын ұйым­дастыратын әкімшілік қыз­мет­керлер мен кіші техни­калық қызметкерлерді қосқанда, бар­лығы 160-тан астам адам филармония құрамында еңбек етеді. Облыстық қазақ драма театрында өткен салтанатты шара фи­лармонияның өткені мен бүгіні туралы деректі фильм көрсетілімімен басталды. Филар­мония ұжымын облыстық мәдениет, мұрағаттар және құжат­тама басқармасының басшысы Дәулеткерей Құсайы­нов құттықтап, өнер адам­дарының ұлтқа, елге, жалпы адамзатқа қыз­мет ететінін баса айтты. К­өрер­мен назарына ұсынылған мерекелік концертте Қазақстанның еңбек сіңірген әртістері, әншілер Қанат­қали Қожақов, Жұмағаным Рахи­мова, Қазақстанның еңбек сіңірген қайраткері Мұрат Әмір­ханов, Қа­зақстанның еңбек сіңірген мәде­ниет қызметкері, домбырашы Ермек Қазиев, эстрада ән­шілері, халықаралық және рес­публикалық байқаулардың лауреаттары Жаңылсын Хасанова мен Марат Сарбөпеев, дәстүрлі әншілер, Қазақстанның еңбек сіңірген қайраткері Қатимолла Бер­діғалиев пен Қазақстанның ең­бек сіңірген әртісі Сәуле Тау­­дае­ва және басқалар өнер көр­сет­ті. Өнерпаздар өз тойында ел­ге ән-жырмен шашу шашып, жұрт­­­шылықтың ризашылығына бөленді. Қазбек ҚҰТТЫМҰРАТҰЛЫ, «Егемен Қазақстан» Орал Суретті түсірген Рафхат ХАЛЕЛОВ