«Ордабасыға» жаңа жаттықтырушы тағайындалды

Шымкенттің «Ордабасы» футбол командасына жаңа жаттықтырушы тағайындалды, деп хабарлайды клубтың ресми сайты. Ұжымды жаңа маусымға ресейлік маман Алексей Петрушин дайындайды. Ол бұған дейін Қазақстан премьер-лигасында бірнеше клубты жаттықтырған. «Қайрат» соңғы рет ел чемпионы атанғанында клуб тізгіні дәл осы жаттықтырушының қолында болатын. Сонымен қатар, 2014 жылы Семейдің «Спартак» командасына да жетекшілік еткен. Алексей Петрушин мен «Ордабасы» арасындағы келісімшарттың анық-қанығы әзірге белгісіз. Қазіргі таңда ол команданы Түркиядағы оқу-жаттығу жиынында жаңа маусымға дайындауда. Петрушин қазақстандық қос клубтан бөлек, Мәскеу мен Минскінің «Динамосын», Туланың «Арсеналын», сондай-ақ «Шинник», «Химки» және өзге командаларды жаттықтырған. Ал футболшылық ғұмырында «Динамо Мәскеу» мен «Пахтакор» клубтарының намысын қорғаған. Айта кетейік, «Ордабасының» бұрынғы бапкері Бахтияр Байсейітов қаңтар айынан бастап клуб президенті қызметіне сайланды.