Универсиада-2017. Шорт-тректен жерлестеріміз финалға шықты

Алматыда өтіп жатқан қысқы Универсиада ойындарында шорт-тректен Қазақстан құрамасының жігіттері мен қыздары финалға шықты. Ерлер арасында 5000 метр қашықтықта Қазақстан құрамасы өз тобын бірінші орынмен аяқтады. Сонымен қатар, ақтық сынға Ресей, Қытай, Оңтүстік Корея елдері жолдама алды. Финал ертең Астана уақыты бойынша 18.00 кезінде өтеді. Қазақстан құрамасынының сапында Абзал Әжіғалиев, Айдар Бекжанов, Денис Никиша, Нұртілек Қажғалиев, Нұрберген Жұмағазиев жарыс жолына шығады. Ал қыздар арасында 3000 метр қашықтықта жерлестеріміз өз тобын екінші орынмен аяқтады. Мұнда сондай-ақ Оңтүстік Корея, Жапония, Қытай елдері финалға шықты. Ақтық ойын ертең Астана уақыты бойынша сағат 17:43-те басталады. Қыздар арасында ел намысын Мәдина Жанбосынова, Ким Йонг А, Анастасия Крестова, Анита Нагай және Ольга Тихонова қорғайды.