Конституцияға өзгерістер талқыланды
Парламент Сенатының депутаты Нұрлан Қылышбаев Алматы облысындағы Ұйғыр ауданында болды. Сенатор аудандық мәслихат депутаттарымен, әкімдік қызметкерлерімен, құқық қорғау органдары және бұқаралық ақпарат құралдарының өкілдерімен, шаруа қожалықтарының басшыларымен және жергілікті тұрғындармен кездесті.
Мемлекет басшысының билік тармақтары арасындағы өкілеттіктерді бөлу жөніндегі Үндеуі жан-жақты талқыланды. Депутат басқару жүйесін жаңғыртудағы Парламенттің рөліне егжей-тегжейлі тоқталды. Кездесу барысында Елбасының Жолдауындағы негізгі ережелерді талқылауға баса назар аударылды. Ұйғыр ауданының тұрғындары мемлекеттегі Үшінші жаңғыру тетіктері туралы бірқатар сауалдар қойды. Н.Қылышбаев елімізде Еуразиядағы ауыл шаруашылығы нарығына негізгі қатысушы болатын қуатты ауыл шаруашылығы кластерін құруға бағытталған Қазақстанның аграрлық кешенін реформалау стратегиясын жиналғандарға жан-жақты айтып берді. Нұрбол ӘЛДІБАЕВ, «Егемен Қазақстан» Алматы облысыҰсыныс-пікірлерін білдірді
Сенат депутаты, Конституциялық заңнама, сот жүйесі және құқық қорғау органдары комитетінің төрағасы Серік Ақылбай мемлекеттік биліктің тармақтары арасында өкілеттіктерді қайта бөлу мәселелері жөнінде Ата Заңға енген өзгертулерді және Елбасының «Қазақстанның үшінші жаңғыруы: жаһандық бәсекеге қабілеттілік» атты Жолдауының негізгі ережелерін түсіндіру мақсатында Қарағанды облысы Бұқар жырау ауданының тұрғындарымен кездесті.
Белағаш ауылдық округінде, Бұқар жырау ауданының орталығы – Ботақара кенті және Ғабиден Мұстафин кенті жұртшылығымен кездесу барысында еліміздің Негізгі Заңы – Конституцияға өзгертулер мен биылғы Жолдаудың негізгі бағыттары бойынша Сенат депутатына бірқатар сұрақ қойылып, ұсыныс-пікірлер айтылды. Белағаш ауылдық округінде «Возрождение» шаруа қожалығының басшысы малдың тек қана сүті мен етін емес, оның мүйізін, тұяқтарын, сондай-ақ терісі мен жүнін де алып, кооперативтерге тапсырып, өндіруге болатындығы туралы пікірін білдірді. Аграрлық сала бойынша әлемдегі үздік елдердің технологиясы мен тәжірибесін пайдалансақ, экспортты арттыруға да, жаһан нарығында өзіміздің брендімізді қалыптастыруға да мүмкіндігіміз зор екенін айтқан Сенат депутаты оған елімізде ресурстарымыз жеткілікті екенін атап өтті. Мирас АСАН,«Егемен Қазақстан» Қарағанды облысыҮшінші жаңғырту міндеттерін түсіндірді
Парламент Сенатының депутаттары Серік Нұрғалиев және Жеңіс Бектұрғанов Қостанай облысына жұмыс сапарлары барысында аймақтың сот корпусымен кездесу өткізді.
Кездесуде Елбасының Қазақстан халқына арнаған «Қазақстанның Үшінші жаңғыруы: жаһандық бәсекеге қабілеттілік» Жолдауын іске асыру барысындағы барлық деңгейдегі сот қызметкерлерінің міндеттері талқыланды. Сондай-ақ, кездесуде еліміздің Конституциясына өзгерістер мен толықтырулар енгізу туралы ұсыныстар да егжей-тегжейлі қаралып, талқыланды. Сенаторлар өз сөздерінде биліктің атқарушы және заң шығарушы тармақтарының рөлін нығайту, саяси жүйені одан әрі демократияландыру және жергілікті мемлекеттік басқару мен өзін-өзі басқару жүйесін жаңғырту туралы әңгімеледі. Осыған байланысты Парламент бірқатар заңдар қабылдайтын болады және қолданыстағы заңнамаға өзгерістер енгізіледі. Кездесу барысында әкімшілік және қылмыстық заңнаманы ізгілендіру мәселесіне, сондай-ақ сот жүйесіне халықтың сенімін арттыру шараларына ерекше назар аударылды. Нәзира ЖӘРІМБЕТОВА, «Егемен Қазақстан» Қостанай облысыЖергілікті халықпен кездесті
Парламент Сенатының депутаты Бекмырза Еламанов Қызылорда қаласында болып, қала активімен, ардагерлермен және жергілікті тұрғындармен кездесті.
Кездесу барысында Қазақстан Республикасының Президенті Н.Назарбаевтың мемлекеттік билік тармақтары арасында өкілеттіктерді қайта бөлу туралы Үндеуін түсіндіру және «Қазақстанның Үшінші жаңғыруы: жаһандық бәсекеге қабілеттілік» халыққа Жолдауын насихаттау жұмыстары жүргізілді.
Жүздесу барысында сенатор міндетті әлеуметтік сақтандыру жүйесіне қатысты қойылған сұрақтарға жауап берді. Ұлтымыздың денсаулығын сақтау еліміздің басты мәселелерінің бірі екенін айтқан Б.Еламанов медицина саласындағы жасалып жатқан реформалар халықтың денсаулығын жақсартуға бағытталғандығын атап өтті.
Ержан БАЙТІЛЕС, «Егемен Қазақстан»
Қызылорда облысы
