Шампунь мен шырын құтысынан есірткі табылды

Қазақстан-Ресей мемлекеттік шекарасы бойындағы қазақстандық шекарашылар есірткілік зат – марихуана өткізбек болғандарды ұстады, ал олардан алынған марихуананың жалпы салмағы 300 грамнан асты, деп хабарлады ҚР ҰҚК ШҚ баспасөз қызметі. Ақтөбе шекара отрядына қарасты «Жайсаң-авто» бақы­лау-өткізу бекетінің шекара наряды қызметтік иттің көме­гімен «Ақтөбе – Орынбор» бағытындағы жолаушылар автобусына шекаралық бақылау өткізу барысында 39 жастағы қазақстандық азаматты ұстауға мәжбүр болды. Аталған азамат­тың күртесінің қалтасынан жасыл түсті, өзіндік иісі бар есірткілік зат – марихуана табылды. Осы күні Қостанай шекара отрядына қарасты «Қайрақ-авто» бақылау өткізу бекетінің шекара сақшылары екі қазақстандық азаматты ұстады. Ұсталғандардың бірі – 24 жастағы жігіт Қазақстаннан Ресей еліне «Тойота» автокөлігімен сапар шегіп барады екен. Шека­ра­лық бақылау кезінде автокөлік ішінен шампуньнің құтысы табылып, ішіндегісі алдын ала сараптама бойынша марихуана болып шықты, салмағы 25 грамм екен. Келесі ұсталған азамат «Қос­танай – Екатеринбург» жолаушылар автобусының жолаушысы болып шықты. Шекаралық бақылау кезінде оның қолындағы шырын құтысынан салмағы 300 грамдай болатын марихуана шыға келді.