Жас зілтеміршілер табысы

Тайландтың Патая қаласында ауыр атлетикадан жасөспірімдер арасында әлем біріншілігі аяқ­тал­ды. Сары құрлықтың кілең мық­тылары жиналған жарыста Қазақстанның зілтеміршілері әдет­тегідей табысты өнер көр­сетті. 3 алтын, 1 күміс және 1 қоланы иеленген құрама мүшелері жалпы есепте көшбасшы командалар қатарынан орын алды. Еліміз ауыр атлетикасының тіз­гінін ұстаған азаматтар бұл бә­секеде санға емес, сапаға жү­гін­ді. Бұл жолы олар небары жеті спортшыны жарыс жолына шы­ға­руды жөн көрді. Тай еліне Ақ­ма­рал Нұрымова (53 кило), Мә­дина Ташкенбаева (58 кило), Виктория Вагнер (69 кило), Ға­лым­бек Жұбатханов (69 кило), Геннадий Ли (77 кило), Максим Лактионов (85 кило) және Василий Ко­шелев (94 кило) аттанды. Олар­дың бәрі де елішілік бәсекелерде өздерінің мықтылығын мойын­да­тып үлгерген спортшылар. Сол себепті қырағы мамандар атал­ған жас өрендерге Азияның бас­ты додасында ел намысын қор­ғау­ды сеніп тапсырды. Азия біріншілігі басталы­сы­мен құрама мүшелері аянбай күш сынасты. Біздің құрамаға ал­ғашқы алтын жүлдені Ға­лым­бек Жұбатқанов жеңіп алды. Отан­дасымыз қоссайыстың қо­ры­тын­ды­сында 275 (125 жұлқи көте­ру+150 серпе көтеру) кило­лық зілтемірді басынан асырып, басты қарсыластарынан қара үз­іп кетті. Келесі күні Мәдина Ташкенбаева тамаша өнер көрсетті. Жұл­қи көтерудің қорытындысы бойын­ша жарыс қожайыны Жарапоржуганнан қалып қойған ол кеткен есені серпе көтеру жат­ты­ғуы ба­ры­с­ында толығымен қай­тар­ды. Мә­динаның нәтижесі – 186 (80+ 106) кило. Тайландтық спортшы біз­дің қыздан екі кило кем көтерді. Тағы бір бас жүлдені Василий Кошелев иеленді. Оған да бұл белес оңайлықпен бағынған жоқ. Алғашқы жаттығуда Қазақстан, Оңтүстік Корея және Өзбек­стан­ның өкілдері шамамен бірдей нәтиже көрсетті. Сайыстың келесі түрінде өзбек зілтеміршісі бірден мүлт кетсе, қалған екеуі біраз тартысты. Қос мықты алтын тұғырға көтерілу үшін барынша күш салды. Десек те Ли Янг Жай қанша талпынғанымен, біздің спортшының екпініне шыдай алмады. Кошелевтің көрсеткіші – 309 (138+168) кило. Ирак спортшысы Әбулкатен Хасимге есе жіберген Геннадий Ли күміс медальді иеленсе, тай елінің қос зілтемірші қыздары Порнпидай Цилетш пен Вассана Шарамға жол берген Виктория Вагнер қола жүлдені қанағат тұт­ты. Ақмарал Нұрымова алтыншы орынға тұрақтаса, Максим Лактионов жарақатына байланысты бәсекеге түсуден бас тартты. Сөй­тіп, Азия чемпионатына қа­тыс­қан Қазақстанның жеті зіл­темірші­сі­нің бесеуі елге олжалы оралды. – Біздің жас спортшылардың көбі шетелге алғаш рет шығып отыр. Тіптен, араларында ұшаққа тұңғыш рет отырғандары да бар. Соған қарамастан, біздің спорт­шылар сын сағатта сыр бермеді. Жарыс жолында ешқайсысы ая­нып қалған жоқ. Жеңіс тұғырына көтерілу үшін барлығы да жанын салды. Өйткені, Қазақстан ауыр атлетикасының даңқы алысқа жайылған. Бүгінгі таңда мемлекет тарапынан спорттың осы тү­ріне барынша қолдау көрсетіліп отыр. Туризм және спорт министрлігі мен «Самұрық-Қазына» әл-ауқат қоры да қолдан келген көмектерін аяп жатқан жоқ. Со­ның арқасында көрсеткішіміз жыл­дан жылға жақсаруда. Со­ның барлығы жасөспірімдер үш­ін үлкен демеу болды. Нәти­же­сінде Қазақстан құрамасы өзінің мықтылығын сары құрлықтың басты додасында да мойындатты, – деді республика Ауыр атлетика федерациясының президенті Қай­рат Тұрлыханов. Осымен, ауыр атлеттер үшін сынақ аяқталған жоқ. 16-22 қыр­күйек аралығында Талдықорған қаласындағы Қазақстан Рес­пуб­ли­касының ІІІ жазғы Спарта­киа­дасы аясында ауыр атлеттердің дүбірлі додасы өтеді. Оған елі­міздің ең мықты деген зілтеміршілері қаты­сады. Сол жарыстың қорытын­ды­сы бойынша 5-13 қа­раша аралы­ғын­да Парижде өте­тін әлем чем­пио­натында кімдер өнер көрсе­те­ті­ні толықтай белгілі болады. Фран­цияның астанасында 2012 жылғы Лондон Олимпиадасының жолдамалары сарапқа салынады. Дастан КЕНЖАЛИН.