Ректор халықаралық «Қазақ тілі» қоғамы облыстық ұйымының төрағасы болды

Мемлекеттік тілдің мерейін үс­тем етуде халықаралық «Қазақ тілі» қоғамының үлесі зор. Осы қоғамның облыстық ұйымының бесінші есеп беру-сайлау жи­на­лысында соңғы он жылда атқа­рыл­ған шаруаларға шолу жаса­лып, ілкімді істер мен шешімін күткен мәселелер ортаға салын­ға­нымен, негізінен қазақ тілінің қа­дірін арттыру жәйі әңгіме өзегіне айналды. Баяндама сыни қалыпта өрбіді. Ақтөбе қалалық, Хромтау және Байғанин аудандық бастау­ыш ұйымдарының жетекшілері Әбдіраш Есмахан, Мәриям Жұма­ғалиева, Гүлжан Дулатбаева өзде­рінде атқарылған істерді егжей-тегжейлі баяндады. Бұдан кейін шығып сөйлеушілер соңғы жыл­дары ұйымның жұмысы бәсеңсіп кеткенін тілге тиек етті. Бұл ба­ғытта бірқатар шаруалар атқарыл­ғанына қарамастан мемлекеттік тілді дамытудағы түйткілдердің жеткілікті екенін де жасырмады. Облыстық ұйым жұмысын жүргі­зудегі бір сарындылық қалыптас­қаны, серпінділіктің жоқтығы ор­тақ ойға тамызық болды. Профессор Ниетжан Беріков мемлекеттік тілді дамытуға қолбайлау кедергі­лердің түйініп тарқата келіп, мемлекеттік тілдің дамуына негізінен орыс тілді қазақтардың ынталы емес екендігін айтты. Ардагер журналист Идош Асқар ұй­ым жұмысын басқарудағы ағат­тық­тарды, ұзақ уақыт ұйымның жи­налысы өтпегенін алға тарта келіп, оның тізгінін жігерлі, бастамамен жұмыс істейтін жастарға беруді ұсынды. «Бейбітшілік пен келісім» кеңесі облыстық бөлім­шесінің төрағасы Келдібай Еспа­ғамбетов мемлекеттік тілдің төрге озуына жергілікті билікті аралас­тыру керектігін айтса, қалалық ба­лалар ауруханасының бас дәрі­гері Қайырбек Тоқтаров билік ба­сындағылардың балаларын қазақ мектептерінде оқытуға құлықсыз­дығын сынға алды. Сонда олар өзінің мемлекетінің болашағына сенбей ме деп ашына сөйледі. Об­лыстық тілдерді дамыту басқар­ма­сы­ның бастығы Сексенбай Кү­лімбетов іс қағаздарын қазақ тілінде жүргізуге мән бермей отыр­ған басқармалар мен департа­мент­­тердің атын атап, түсін түс­теді. Мемлекеттік тілді қолдану­дың банк, құқық қорғау салала­рын­да кемшін соғып жатқанын жасырмады. Шыны керек, жина­лысқа қатысушылар қазақ тілінің қадірі қайтсе артады деген тол­ғақ­ты мәселені қозғап, осы төңі­рек­те ой өрбітті. Облыстық ұйымның есеп беру-сайлау жиналысына халық­ара­лық «Қазақ тілі» қоғамының президенті Өмірзақ Айтбайұлы қаты­сып, сөз сөйледі. Облыстық ұй­ым­ның жаңа төрағасы болып Ақ­төбе мемлекеттік педагогикалық институ­ты­ның ректоры, эконо­ми­ка ғы­лым­дарының докторы Ға­лым­жан Нұрышев бірауыздан сайланды. Сатыбалды СӘУІРБАЙ, Ақтөбе облысы.