Ертең АҚШ-тағы жойқын қасіретке 10 жыл толады. 2001 жылдың 11 қыркүйегі адамзат тарихында бұрын-соңды болып көрмеген сұрапыл теракт ретінде есте қалатыны анық. Лаңкестер Нью-Йорктегі аспанмен таласқан Бүкіләлемдік сауда орталығының «егіз» ғимараты мен Пентагонның бір бүйірін жермен жексен етті.
Жоспар бойынша, төртінші ұшақ АҚШ парламентінің күл-талқанын шығаруы тиіс болатын. Әуе кемесінің бортындағы жолаушылар адам кейпіндегі хайуандардың бұл әрекетіне жол бермей, ұшақ елді мекенсіз ашық далаға құлаған еді. Мыңдаған жазықсыз адам құрбан болды. Енді мұндай тағылық ешқашан, еш жерде қайталанбасын дейік.
«Барбаросса» жоспарын орындауға кірісті
Түріктің әскери командованиесі «Барбаросса операциясы – Эгей қалқаны» деп аталатын жаңа әскери-теңіз стратегиясын жасады. Аталған стратегия шеңберінде түріктер флотының бір бөлігін Қара және Мәрмәр теңіздерінен алып, оларды Жерорта теңізінің шығыс жағына бағыттайды.
Атап айтқанда, Анкара айтарлықтай күшін Кипр мен Израиль жағалауларына жинамақ. Күшейтілген топты әуеден сол маңдағы авиабазада орналасқан әскери ұшақтар қорғайтын болады. Сондай-ақ түріктің әскери корабльдері Адриатика және Қызыл теңіздерде тұрақты әскери кезекшілік атқаратын болады. Бұл өзгерістер Түркия мен Израиль арасындағы кикілжіңге байланысты орын алып отырғаны да күмәнсіз.
Жұмыссыздықпен күрес жоспарын ұсынды
АҚШ президенті Барак Обама өзінің әкімшілігі жасаған экономиканы ынталандыру жоспарын ұсынды. Аталған құжатқа сәйкес, жұмыссыздықпен күреске 447 миллиард доллар жұмсау жоспарланыпты. Құрама Штаттардағы сайлауға әлі бір жылдан астам уақыт қалғанымен, бұл жоспар Б.Обаманың көзірі болатын сыңайы байқалады.
Ақ үй қожайынының жоспары жаңа жұмыс орындарын құрып, еңбекақыға салықты төмендетуді көздейді. Мұғалімдер, жедел қызмет түрлерінде істейтіндерді қысқартпау үшін 35 миллиард доллар шығындау белгіленіпті. 50 миллиард доллар алты миллион жұмыссыз үшін жәрдемақы төлеуге жұмсалмақ. Жоспар бойынша, мемлекеттік мектептерді жаңғыртып, инфрақұрылымдарын дамытуға, темір жол, көпірлер, әуежайлар құрылысына да айтарлықтай қаржы қарастырылған.
Әуе кеңістігін бұзды деп айыптады
Ресейдің үш әскери тікұшағы Грузияның әуе кеңістігінен заңсыз өтіп кеткен. Мұны Грузия сыртқы істер министрлігіне сілтеме жасай отырып, «Интерфакс» агенттігі хабарлады. Тікұшақтар Грузия аумағына үш шақырымдай еніп, әуе кеңістігінде 15 минөттей болған.
Бұл әрекеттің Грузия тарапын арандату үшін жасалғаны анық. Бірақ Тбилиси соғысты қайта жандандырмау қағидатына беріктік танытты, делінген Грузия СІМ-інің мәлімдемесінде. Сыртқы саясат ведомствосы сондай-ақ халықаралық қоғамдастықты Ресейдің іс-әрекетіне назар аударуға шақырған. Ресей жағы бұл ақпаратты теріске шығарып отыр.
Президенттің отбасы күзетсіз қалады
Қырғызстан парламенті республика президентінің отбасы мүшелерін күзетпен қамтамасыз ету туралы заң жобасын қабылдаудан бас тартты. Депутаттар президенттің жақындарына күзет қажет емес деп есептейді.
Парламент спикері Ахматбек Келдибековтің айтуынша, бұрынғы режімдерде мемлекет басшысының туысқандары емін-еркін өмір сүрді. Күзетінің мықты болғаны соншалық, олар президент сияқты жүрді. Бұл жерде өтпелі кезең президенті Роза Отунбаеваның пікірі өзгеше: ел басшысы отбасының қауіпсіздігі ел қауіпсіздігіне тікелей байланысты, дейді ол.
Мысыр виза режімін қатаңдатты
Египет жақын арада көптеген елдерге қатысты виза режімін қатаңдатпақ ниетінде. Енді Египетке енетін адамдар алдын ала виза алулары тиіс. Жолдаманы тур-операторлар арқылы ресімдеген туристерге бұл өзгерістердің қатысы жоқ.
Мысыр басшылығы мұндай қадамға қауіпсіздік шараларына байланысты барып отырған сияқты. Ал мұның туристерге қатысы жоқтығын түсінуге де болады. Өйткені, туризм Египеттің ең басты кіріс көздерінің бірі болып табылады. Мәселен, тәртіпсіздіктер орын алмаған 2010 жылы Мысыр туризмнен 13 миллиард доллар кіріс кіргізген.
Қысқа қайырып айтқанда:
*2011 жылы жер сілкінісінен сақтандырылған шығын рекордтық көрсеткішке жетіп, 70 миллиард долларды құрады. Мұның ішіндегі ең зардаптысы Жапониядағы жер сілкінісі туындатқан цунами болып табылады. *НАТО-ның Ауғанстандағы әскери контингенті өздерінің құрамындағы солдаттың ВВС корпорациясында жұмыс істейтін жергілікті журналисті өлтіргенін мойындады. НАТО өкілінің айтуынша, әскери қызметші журналист Ахмед Омед Хпулвакті қарулы жасақ деп шатастырыпты. *Боливияда екі қозғалтқышты шағын ұшақ апатқа ұшырап, оқиға салдарынан 9 адам опат болды. Құтқарушылардың сөзіне қарағанда, ұшақтың қаңқасы толық қираған және ешкім тірі қалмаған. Апат себебі белгісіз. *АҚШ президенті Б.Обама қатты су тасқынына байланысты Пенсильвания және Нью-Йорк штаттарында төтенше жағдай жариялады. Аталған штаттардан 100 мыңнан астам адам қауіпсіз жерлерге көшірілген. 5 адам опат болған деген мәлімет бар. Интернет материалдары негізінде әзірленді.
