Талапкерлерге тарту

Заман талабына қарай оқу­шыларға мектептен бастап, білім берудің жаңа жүйесін меңгерту қажеттігі туындап отыр. Әсіресе, жаңа техниканы, технологияны пайдаланып, қашықтықтан оқы­туды жүзеге асыру соңғы жыл­дары елімізде кең қанат жая бастады. Соның бір дәлеліндей, өткен дүйсенбі күні елордадағы №53 мектеп-лицейдің базасында «e-Iearning» электронды оқыту жүйесінің қанатқақты жобасы іске қосылды. Бұл еліміздің 2011-2012 жылдарға арналған мемлекеттік бағдарламасының аясында орын­далған жұмыс. Оның тұсаукесер рәсіміне Білім және ғылым министрі Б.Жұмағұлов, Байланыс және ақпарат министрі А.Жұмағалиев қатысты. Жаңа оқу жылында атқарыл­ған бұл іс Астана – Алматы қалалары мен Қарағанды облыс­тарын электронды оқыту жүйе­сімен қамтитын 44 білім беру ұйымдарының арасын жалғас­тырады. Олардың қатарында мектеп, колледж және кәсіптік лицейлер бар. Бұл жүйе оқушының тұрғылықты жеріне қарамастан, ауыл, қала демей, бәрінде де оқытыла береді. Мұндай жақсы қадам ауыл мектебі мен қала мектебінің арасындағы алшақ­тықты жоюға септігін тигізері сөзсіз. Бұл құрылым интернетке қосылатын болады. Өзге де материалдық-техникалық жаб­дық­тар орнату көзделген. Сол секілді білім беру үлгісін толық автоматтандыру арқылы мұғалім­дердің жұмысын жақсартуға, олардың сабаққа дайындалуына едәуір жеңілдіктер жасайтынын да айта кеткеніміз ләзім. Бұл жобаның жүзеге асырылуы екі кезеңнен тұрады. Бірінші кезеңде (2011-2015) білім беру ұйым­дарының 50 пайызы, ал екінші кезеңде (2016-2020) 90 пайызы іске қосылмақ. Сүлеймен МӘМЕТ.