Сарапшылар берген оң баға

«Хабар» телеарнасы Мемлекет басшысы Нұрсұлтан Назарбаевтың ғаламдық деңгейдегі бейбітсүйгіштік бастамаларына орай «Әлем. XXI ғасыр» тақырыбы аясында телемарафон ұйымдастырды. Мәскеу, Анкара, Брюссель, Берлин қалаларындағы саяси сарапшылар телеарна арқылы Астанамен тікелей эфирге қосылып, еліміздің Тәуелсіздіктің ширек ғасырында қол жеткізген жетістіктеріне және Қазақстан Президентінің әлемдік қауіп­сіздікті сақтау бағытындағы баға­лы бастамаларына қатысты өз ой-пайым­дарымен бөлісті. Мәселен, Энергетика Хартиясы­ның бас хатшысы Урбан Руснаг арна жур­налисінің «Қазақстанның Тәуел­сіздік алған жылдардан бергі жеткен жетістіктерінің ішінде неге айрықша тоқталар едіңіз?» деген сауалына былай деп жауап берді. «Мен шын жүректен Қазақстанды және қазақстандықтарды Тәуелсіздіктің 25 жылдығымен құттық­таймын. Бұл айтулы мерейтой осынау жылдардың бедерінде Қазақ халқының бағындырған белестерімен тұспа-тұс келіп қана қоймай, оны айқын көр­сетіп отыр. Энергетика Хартиясы Қазақ­стан­ның жер қойнауындағы қазба бай­­лық­тарды игеру және оларды пай­да­лану бойынша өз ұстанымдары мен қағи­даларын жаһандық тұрғыда нығай­тып келе жатқанын жақсы біледі. Мұн­дай табиғи байлықтар Қазақстан эконо­микасының дамуына ықпал етіп қана қоймай, болашақты ойлай отырып, дамудың жаңа бағытына – жаңартылған энергия көздерін игеруге көшуіне, осы бағытқа қарай қадам басуына сеп болуда. Осындай бағытты ұстанған Қазақ­станның болашағына сеніммен қарауға болады деп ойлаймын». Қазақстанның бейбітшілікті қамта­масыз етуге қосқан үлесі, соны­мен қатар, бейбітсүйгіштік қасиетті алға ілгері­лету бағытындағы тұрақты бастама­лары туралы бүкіл әлем білетіні анық. Қазақ­­станның бұл ұстанымдарына құр­метпен қарайтын мемлекеттердің бірі – Германия. Сондықтан, бұл мәселе жөнін­де Орталық Азия елдері бойынша неміс сарапшысы Гюнтер Кнабе айтып берді. Ол тілшінің: «Гюнтер, сіз Қазақ­станның жетістіктері туралы не айтар едіңіз?» – деген сауалына жауап бер­местен бұрын, ең алдымен, қазақ хал­қын Тәуелсіздіктің ширек ғасыр­лық мерей­тойымен құттықтады. «Мен бар­ша қазақ жұртын 25 жылдық мерей­той­мен құттықтай отырып, бақыт, сәт­тілік тілеймін», – деді ол. Осылай деген Гюн­тер Кнабе әлемді алаңдатқан ядро­лық қару төңірегіндегі мәселесіндегі Қазақ­станның қадамдарын ерекше атап өтті. «Менің ойымша, ауыз толтырып айтатын ең басты жетістіктердің бірі – Қазақстанның ядролық қарудан өз еркімен бас тартуы. Себебі, Тәуелсіздік алған алғашқы кезеңде Нұрсұлтан Назарбаевтың әлемдегі күш-қуаты бойынша төртінші ядролық арсеналды толығымен жою турасындағы батыл шешімі біздің тарапымыздан үлкен әрі терең құрмет көретуді қажет етеді. Мен Президенттің тек ядролық қарусыз­дану бойынша көтерген бастама­ларына ғана емес, бүкіл дүние жүзінде бейбітшілікті орнату бағытындағы іс-қимылдарына жоғары баға берер едім», – деді ол. Бұл ретте, сарапшы Елбасы өзінің «Әлем. XXI ғасыр» манифесі арқылы әлем­дік державаларды жаппай қырып-жою қаруынан түбегейлі бас тартуға шақыр­ғанына айрықша тоқталды. «Қазақстан Көшбасшысы дүние жүзі державаларын жаппай қырып-жою қаруынан бас тартуға және әлемдегі барлық әскери жанжалдарды дереу тоқтатуға шақырған болатын. Қазіргі таңда Президенттің мұндай бастамалары өте өзекті болып тұр», – деді Гюнтер Кнабе. Ләйла ЕДІЛҚЫЗЫ, «Егемен Қазақстан»