Бейбітшілік пен береке бастауы

Парламент палата­лары­ның бірлескен отырысында депутаттар қабылдаған ел Тәуел­сіз­дігінің 25 жыл­дығына ар­налған Дек­ларацияның толық мәті­нін ел газеті «Егемен Қазақ­стан» басылымынан оқып шық­тым. Әлемнің өрке­­ниет­ті дамыған 30 елінің қатарынан өзіндік орны­мыз­ды алуға талпынып отырған Қазақ­стан­ның ширек ғасырда жеткен жетіс­тіктерін қалай дәріптесек те еш артықтығы жоқ. Қазақ­та «Жақсы сөз – жарым ырыс» деген сөз бар. Сон­дықтан ЭКСПО-2017 халықаралық маман­дандырылған көрмесін Елор­дамызда өткізуге мүм­кіндік алғанымыздың өзі неге тұра­ды?! Енді сол сындарлы сәттен жақсы өтіп әлем халықтарының алдында беделі­мізге бедел қоссақ, нұр үстіне нұр болары анық. Негізі, бұл көрме жағрафиялық орналасу ыңғайлылығы Еуропа мен Азияның орта тұсы болып та саналатын бас қаламыздың бағын аша түсетініне кәміл сенеміз. Ең бас­тысы, елдігімізді танытар игілікті іске жанашыр болып, қолдау әрі тілеуқоры бола білу де керек. Ақыл таразысына салып, экономикалық тұрғыдан қарапайым ғана талдау жасасақ, бүгін­де бірқатар елдер өз өнімдерін осы халық­аралық көрмеде көрсету үшін өздеріне бөлінген орындарын алуда. Бұл – істің ілгерілеуіне себепші болатын қадам.Себебі, қатысушылар саны артқан сайын өзара бәсекелесу пайда болады. Ол көрменің атын шығарып қана қоймай, сан сала бойынша Қазақстанға келушілер­дің қызығушылығын да тудырады. Сонда сапалы қызмет көрсету арқылы да кіріс көзі табылары анық. Тізбелей берсек, ЭКСПО-2017 халықаралық маман­дан­дырылған көр­ме­­сі­нің бізге беретін пайдасы өте көп. Тек соны ұтым­ды әрі әділ пайдалана білу міндет. Сонда Қазақ­станның аты бейбіт те, берекелі ел ретінде халық жадында сақта­ла береді деп ойлаймын. «Ырыс алды ынтымақ» деген даналықты берік ұстанған еліміздің күнделікті өмірінде татулықтың сан үлгісі көрініс табуда. Айталық, 130 этнос өкілі тұратын еліміздегі ты­ныш­тықты кейбір мемлекеттерде тұра­тын халықтар армандап жүргенін дәлел­деп отырудың өзі артық. Шетелдік инвес­торлардың да Қазақстанға келіп бизнестерін өркендетуге талпынатыны да еліміздегі тыныштықтың жемісі болып табылады. Біле білсек, Қазақ­станның 2017-2018 жылдарға БҰҰ Қауіпсіздік Кеңесінің тұрақты емес мүшесі болып сайланғаны да Тәуел­сіздіктің ширек ғасырында жеткен сүбелі жетістігі болып саналады. Серікбай НҰРҒИСАЕВ, Мемлекеттік қызмет істері және сыбайлас жемқорлыққа қарсы іс-қимыл агенттігінің Алматы облысы бойынша департаментінің басшысы   ТАЛДЫҚОРҒАН