Комедия жанрының хас шебері голливудтық режиссер Чак Рассел «Қазақфильм» киностудиясына келді

Осы күндері Еуразия аумағындағы ең ауқымды кинофестивальға қатысу мақсаты­мен Қазақстанға әлемге аты мәшһүр кинематография өкілдерінің жолы түсіп отыр. Міне, фантастикалық комедия жанрындағы аса табысты фильмдері арқылы даңқы шыққан голливудтық режиссер Чак Рассел де Ал­матыға келді. Оның Джим Керри сынды актердың та­лан­тын ашқан «Маска», «Мумия оралады», Дуэйн Джонсон ойнаған «Сарышаяндар пат­шасы», Арнольд Шварценеггердің қатысуы­мен түсірілген «Стиратель» немесе «Кошмар на улице Вязов» сияқты киноленталарын та­машаламаған жан кемде кем болар?! Ешқандай таныстыру мен жарнамаға мұқ­таж емес режиссердің бұл қазақ жеріне тұңғыш қадам басуы. – Мен Қазақстанға келгеніме қуаныш­тымын! – дейді әйгілі режиссер. Чак Рассел осы уақытқа дейін Қазақстан мен «Қазақфильм» киностудиясы жайлы көп естіп жүрген көрінеді. «Мың рет естігенше – бір рет көрген артық» дегендей, ол біздің ұлттық киностудияның «Еуразия» кинофестиваліне шақыртуын қуана-қуана қабыл алыпты. Осылайша, қадірлі қонақ Ш.Айманов ат­ын­дағы «Қазақфильм» киностудиясын аралап, озық кинематографиялық техникалармен жабдықталған түсіру алаңдарын, түрлі қызмет атқаратын студияларды өз көзімен көріп шықты. Сондай-ақ, «Қазақфильм» киностудиясы» АҚ президенті Ермек Аманшаевпен кездесіп, өзінің алдағы киножобаларына «Қазақ­фильм­нің» қатысуы әбден мүмкін екендігін алға тартқан ол бірқатар танымал актерлармен кездесіп, өзінің жаңа персонаждарына сай келетін адамдарды кездестіргенін де мә­лім­деп үлгерген. Голливудтық режиссер жас қазақ режиссері Ахат Ыбраевтың карти­на­сы­мен танысып, оң пікір білдірген де көрінеді. Сонымен, алдағы уақытта ұлттық кино­сту­диямыз әлемнің айтулы режиссерімен әр­іптестікке қол жеткізетін түрі бар. Ал фан­тастикалық комедия жанрын қайта жаң­ғыр­туда Чак Рассел сынды майталмандардың тәжірибесі ешқашан артық болмайды. Айнаш ЕСАЛИ, Алматы. Суреттерде: Чак Рассел «Қазақфильм» киностудиясында