Шымкентте автобус құрастырылуы мүмкін

Шымкентте қоғамдық көліктің жаңа түрі құрастырылуы мүмкін. Қазір жергілікті кәсіпкерлер Беларусьтегі автобус жасайтын зауытпен өзара келіссөз жүргізіп жатыр, деп хабарлады 24 Хабар арнасы. Іскер топ тіпті жергілікті жолаушылар тасымалдаушы компания өкілдеріне автобустың алғашқы нұсқасын алып келіп таныстырды. Көлік қатты отынмен қоса газбен де жүреді. Сондықтан оның қоршаған ортаға экологиялық зияны өзгелермен салыстырғанда анағұрлым аз. Оған қоса қоғамдық көлікте қоларбаға таңылған жандардың мініп-түсуіне ыңғайлы жағдай жасалған. Жоба жүзеге асса, жылына осындай 150 автобус жинақтауға мүмкіндік туады. Әлеуметтік жобаға 1 млн доллар көлемінде инвестиция алып келген кәсіпкерлер келесі жылы өз есебінен қосалқы бөлшектер шығаратын кәсіпорын ашпақ. «Қоғамдық көлікті лизингке беру жағы да қаралған», - дейді мамандар. - Бұл тиімді, бұның жақсы жері еуро-5-пен және газбен жүреді. Дизельмен де жүретіні бар. Бізге қайсысы қолайлы келеді, осы жерде тасымалдаушылар бар, солар қолдаса, соны бастаймыз, дейді кәсіпорын басшысы Бақыт Жасұзақов.