«Туған жер» бағдарламасының аясында мектептерде «Туған өлке тарихы» сабағын өткізу, ескерткіштерді қалпына келтіру жұмыстары, қаланың инфрақұрылымын жақсарту мақсатында әлеуметтік маңызды нысандарды жөндеу, «Таза көше», «Таза аудан» акцияларын ұйымдастырып, жас тарихшылар мен өлкетанушылардың жиынын өткізу жоспарланған. Қала тұрғындары өз идеяларымен бөлісу үшін краудсорсингтік онлайн-платформа жасалынып, қаланың туристік картасы сызылды. Сондай-ақ, қалалық телеарналардан «Туған жер» реалити-шоуы жүзеге аспақ.
Жиында сөз сөйлеген академик Карл Байпақов: «Әр қаланың келбеті театрлар мен музейлердің көптігімен өлшенеді. Алматының мыңжылдық тарихында болашаққа айтар сөзі көп. Жетісу өлкесіндегі қорғандар – күрделі архитектуралық нысандар. Оның көбі белгілі. Алматыда ашық музей жасайтын қорғандар жеткілікті. Оның бірі Розыбакиев көшесінде орналасқан», – деді.
Қала әкімі бұл ұсынысты қолдап, ежелгі қорғандардың қалдықтары қалған, жекеменшікке өтіп кеткен жерлерді мемлекетке қайтаруды қарастыруды ұсынды. Өйткені, туған жердің тарихы ұлтқа ортақ.
Қала бойынша салынып жатқан балабақшалар мен мектептердің саны көп. Наурызбай ауданындағы әкімшілік ғимарат пен мектеп, әлеуметтік нысандар жылдың соңына дейін құрылыс жұмыстарын аяқтайтыны айтылды. Жеке кәсіпкерлердің демеушілігімен салынып жатқан ғимараттар Алматы шаһарының көркі. Қала әкімі көпшіліктің атынан меценаттарға алғыс айтты. Сондай-ақ, жазушы, Мемлекеттік сыйлықтың лауреаты Бексұлтан Нұржекеұлы аты аталмай жатқан батырлардың аттарына көше, мектеп беруді ұсынды.
Елбасының бағдарламалық мақаласы аясында жүзеге аспақ жобаны бақылайтын қалалық комиссия құрылды. Қала басшысы істің тек сөз жүзінде қалмай, іске асуын бақылауда ұстайтынын айтты.
Бағашар ТҰРСЫНБАЙҰЛЫ,
«Егемен Қазақстан»
