Бұған дейін мектеп-интернат тәрбиеленушілерінің жағдайы күрделі болған. 1975 жылы салынған ескі ғимаратта орын тапшылығы болып, 125 орынға есептелген нысанда 290 бала тұрған. Инфрақұрылымның тозуы балалардың өмір сүру сапасына да әсер еткен.
«Жаңа жатақхана бұл мәселелерді толық шешуге бағытталған. Жалпы ауданы 8288,70 шаршы метрді құрайтын нысан 300 орынға арналған және заманауи стандарттарға сай салынған. 3,5 гектар аумақта балалардың бос уақытын тиімді өткізуі үшін футбол алаңы, воркаут аймағы, ойын және демалыс алаңдары қарастырылған», делінген жазбада.
СҚО-дағы ауылға қайтарылған қаржы есебінен ауыз су құбыры тартылды
Ғимарат ішінде ұлдар мен қыздарға арналған бөлек тұрғын блоктар, заманауи медициналық кабинет, кең ойын бөлмелері және балалардың дамуына қолайлы басқа да функционалдық кеңістіктер бар. Бұл тәрбиеленушілер үшін қауіпсіз әрі жайлы орта қалыптастыруға мүмкіндік береді.
Жобаны жүзеге асыру үшін Мемлекет басшысының тапсырмасымен қайтарылған активтер мен оларды сатудан түскен қаражат жинақталған Арнаулы мемлекеттік қордан 2,6 млрд теңге бөлінді.
Бас прокуратураның мәліметінше, бұл бағыттағы жұмыс жүйелі түрде жалғасып жатыр. Қайтарылған қаражат есебінен ел бойынша шамамен 500 млрд теңгеге 440 әлеуметтік және коммуналдық нысанның құрылысы қаржыландырылды. Олардың 319-ы қазірдің өзінде пайдалануға берілген. Бұл қатарда мектептер, ауруханалар және сумен жабдықтау жүйелері бар.
Жауапты органдардың айтуынша, қайтарылған әрбір теңге халықтың игілігіне жұмсалуы тиіс. Бұл қаражат әлеуметтік маңызы бар жобаларды жүзеге асыруға, азаматтардың өмір сүру сапасын арттыруға және өңірлерді дамытуға бағытталып отыр.
