Цифрлы хабар тарату үшін екі жыл қажет
«2019 жылы Қазақстанда цифрлы эфирлік телерадиохабарларын тарату ісі жоспарланып отыр. Ал оны іске қосу үшін 827 радиотелевизия стансасын салу қажет. Ол үшін біз бұл істі бір мезгілде бүкіл еліміз бойынша қолға алуымыз керек. Барлық 827 станса салынып бітпейінше, тарату жүзеге асырылмайды. Қазіргі кезде 700-ден астам осындай станса салынған. Екі жыл бедерінде біз бұл жұмысты аяқтауды жоспарлап отырмыз», деді Д.Абаев.
Министрдің сөзіне қарағанда, бұдан бөлек, 3240 дана осындай хабар тарату құрылғыларын ажыратып тастау қажет болады. «Бес-алты облыста цифрлы хабар таратуды бүгіннен бастауға да болады. Ал баламалы құрылғылар ажыратылып тасталған кезде халықтың белгілі бір тобы атаулы әлеуметтік көмекті қажетсінуі ықтимал. Өйткені, хабар тарату құрылғыларын қосу белгілі бір деңгейде ақша болуын талап етеді. Сондай-ақ, ел азаматтарының әлеуметтік жағынан қаншалықты қауқарлы екені де тексеріліп жатыр», деді аталған мәселеге қатысты сөзінде Д.Абаев.
Қуғын-сүргін құрбандарына арналған жоба
«Биыл Мемлекет басшысының саяси қуғын-сүргін және ашаршылық құрбандарын еске алу туралы Жарлыққа қол қойғанына тура 20 жыл толады. Осы жылдар ішінде аталған Жарлық шеңберінде этномәдени бірлестіктер мен басқа да түрлі алаңдарда шаралар өткізіліп келеді. Жалпы, мамыр айында қазақстандықтар тарихи екі өте қорқынышты қасіреттерді еске түсіреді: 9 мамырда және 31 мамырда. Бұл шаралардың басты мақсаты – сол қасіретті кезеңдерді ұмытпай, есте сақтау», деді «Хабар» телеарнасындағы «Открытый диалог» жобасының эфирінен ведомство басшысы.
Бір реттік парольге көшу ұсынылды
«Открытый диалог» жобасы аясында мемлекеттік қызмет көрсетулерге қатысты да әңгіме қозғалды. Мұнда электронды цифрлы қолтаңбаны бір реттік парольдерге ауыстыру туралы идея ерекше назар аударуға тұрарлық.
«Электронды цифрлы қолтаңбаны біз шамамен осыдан он жыл бұрын іске қоссақ, сол кезде ол уақыт рухына жауап берді. Қазір біз бір реттік парольге көшуді ұсынып отырмыз. Адам бір реттік парольдің көмегімен кірген соң, бір транзакцияны орындап, қайта шығып кете алады. Келесі жолы оның телефонына жаңа пароль келеді. Жүйе жеңілдейді», деп атап көрсетті министр.
«Біз ХҚО-лар беретін анықтамалар санын алып, сараптаудан өткіздік. 23 млн анықтаманың шамамен 18 млн-ы бар-жоғы бес анықтамаға тиесілі екен. Содан соң біз бұл анықтамаларды адамдардың қайда апаратынын сараптадық. Сөйтсек, шамамен 30 пайызы (анықтамалар – ред.) мемлекеттік органдарға апарылады екен. Қазір бізге мемлекеттік корпорацияның («Азаматтарға арналған үкімет» – ред.) ақпараттық жүйелері қажет, өйткені, адамдар анықтаманы алып, оны қайтадан мемлекетке апарып бермеуі керек. Ол үшін ақпараттық жүйелер өзара интеграциялануы тиіс», деді министр.
