Комиссия мәжілісі кезінде Президент мақаласынан туындайтын «Туған жер», «Қазақстандағы 100 жаңа есім», «Жаңа гуманитарлық білім. Қазақ тіліндегі 100 жаңа оқулық», алфавитімізді қазіргі кириллицадан латын қарпіне көшіру және «Қазақстанның киелі жерлерінің географиясы» туралы бағдарламалар барысы талқыланды. Біз осының ішінде латын қарпіне көшуге қатысты айтылған ой-пікірлерге басымдық бергіміз келеді. Өйткені, бұл мәселе мақалада көрсетілген, өзге бағыттарға қарағанда түсіндіру жұмыстарын көбірек қажетсінетіні айтпаса да белгілі.
Тағы бір қойылар талап − латын алфавитіне көшу жөніндегі ойлар мен пікірлер алдын ала белгіленген тұжырымдамалық құжаттар аясынан аспағаны жөн. Өкінішке қарай, қазіргі күні мемлекетіміздің өркениетті жолға бет бұруының бір белгісі іспеттес, бұл мәселе тек филолог мамандар мен белгілі бір лингвистикалық топтардың арасында ғана талқылау нысанына айналған. Ал халықтың қалың тобы әзірге бағдарламалық бағытқа қатысты ой-пікірлерін ортаға салудан тыс қалып отыр.
Осы олқылықтың орнын толтыру жөнінде Ақтөбе облысында байыпты бастамалар пайда бола бастағаны көңілді демейді. Соның бір дәлелі өңірдегі тұсаукесер сағаттары мен латын әліпбиін меңгеруге қатысты ақысыз курстар ұйымдастыру жөніндегі ұмтылыстар болып табылады. Ақтөбе облыстық тілдерді дамыту басқармасының басшысы Гүләйім Төлебаева өз ой-пікірін осы арнадан сабақтады. Келесі кезекте өз дәуірінде латын әліпбиін қолдаған тарихи тұлғалардың бірі, қазақ тіл білімі ғылымының көрнекті өкілі, осы өңірдің тумасы Құдайберген Жұбанов екенін айтпай кету шындыққа қиянат. Бір сүйсінерлігі бүгінгі күнге дейін жүргізілген әлеуметтік зерттеулер мен талдаулардың қорытындылары Ақтөбенің бүгінгі тұрғындарының 67 пайызы латын алфавитіне көшудің қажеттілігін қолдағанын көрсетеді,− деді бұдан әрі газет тілшісіне Гүләйім Тельманқызы.
Алдыңғы ойымызды одан әрі шегендеп, шегелер тұста латын әліпбиіне көшу жұмыстарының еліміздің рухани әлемі үшін аса қажет іс екенін тайға таңба басқандай түсіндіріп беруі үшін тиісті кадрлар корпусы әзірленіп жасақталуы керектігі де басы ашық мәселе. Бұл тұрғыда Құдайберген Жұбанов атындағы Ақтөбе өңірлік университетінің ректоры Бауыржан Ердембеков қазіргі күннің өзінде «Қазына» ғылыми-зерттеу орталығы құрылғанын алға тартты. Оның айтуынша, жоғары оқу орнында латын қарпіне көшу мәселелеріне байланысты көпшіліктің сауалдарына сауатты да тұжырымды жауаптар қайтара алатын лекторлар тобын әзірлеуге де назар аударыла бастаған.
Темір ҚҰСАЙЫН,
«Егемен Қазақстан»
АҚТӨБЕ
