Аудандар мен қалалардан балалары және немерелерімен қол ұстасып сахнаға шыққан отбасылары бейнеттің соңында зейнеті болатынын, бақ пен береке ақыл мен төзім, сыйластық, махаббат пен сүйіспеншілік, мейірім жүрген жерге қонақтайтынын айтып тұрғандай болады.
Осы уақытқа дейін «Мерейлі отбасы» Ұлттық байқауы республика бойынша төртінші рет өткізілді, оның аудандық, қалалық, облыстық және республикалық сатыларына Қостанай облысынан 400-ден аса отбасы қатысты. Биыл да «Мерейлі отбасы» байқаулары сатылай өтіп, іріктелгендер облыстық сынға қатысты.
Бұл жолы байқаудың «Парасатты отбасы» аталымымен Денисов ауданындағы Аят ауылында тұратын Мақаевтар отбасы ие болды. Ғалам атай мен Қарлыға әжей он бір бала тәрбиелеп өсірген. Барлығы да еңбекте, өмірден орындарын тапқан, балалы-шағалы. Отбасының ортақ иігілігіне айналған шаруа қожалығын Ғалам атайдың өзі басқарады.
– Көп балалы отбасының қуанышы көп, қиындығы жоқ, өйткені бірлесіп көтергеннен, бірлік болғаннан кейін ауырлық ешқашан білінбейді, – дейді Ғалам атай.
«Өнегелі отбасы» аталымымен Сарыкөл ауданында тұратын Мишенковтар отбасы лайық деп танылды. Юрий мен Екатерина алты бала тәрбиелеп отыр. Отағасы да, отанасы да «Аманжол-Агро» шаруашылығында жұмыс істейді, алтын астық өндіреді. Балалары шетінен жақсы оқиды, тәртіпті, үлгілі. Кішкентай Мишенковтар спортпен айналысады, музыка мектебіне барады. Гір көтерумен айналысатын ұлы Василий аудан, облыс қана емес, ел намысын дүлдүлді жарыстарда қорғап жүр. Өткен жылы Еуропа чемпионатына қатысып, күміс медаль алып қайтты.
– Баланы еңбекке, адамгершілікке, адалдыққа баулимыз, өзіміз үлгі болуға тырысамыз. Үлкен қызым Аня Юрий екеуміздің көмекшіміз, әкесі екеуміз күнімен жұмыстамыз, балаларға, үйге қарайды. Іні-сіңілілері айтқанымен жүреді, тыңдайды, – дейді «Күміс алқалы» ана Екатерина.
«Мерейлі отбасы» аталымымен байқаудағы Амангелді ауданы, Қарасу ауылында тұратын Мұздахановтар отбасы лайық деп шешілді. Бұл көп балалы ғана емес, аты Қостанай-Торғай өңірінен асып, республикаға белгілі өнерлі отбасы саналады. Айтбай мен Ханзада Мұздахановтар 4 бала тәрбиелеген, немерелер өсіп жатыр. Айтбай ағаның 1977 жылы 36 жасында өндірістік жарақаттан бір қолын кесуге тура келді. Қиындықтар болмай қалған жоқ. Өнер дарыған жігерлі кісі 9 жылдан кейін кесілген қолына сым жалғап, қасиетті домбырасын қайтадан ұстады. Қазір 60 күйдің, 40 әннің авторы. Қазақстанға еңбек сіңірген мәдениет қайраткері, Амангелді ауданының құрметті азаматы. Мұздахановтар балаларын, немерелерін музыкаға баулыды. Ал әкенің өнер жолын қызы Анар жалғады. Ол қазір Астана қалалық академиялық филармониясының белді күйшісі. Айтбай аға Ханзада екеуі 55 жыл отасып, 15 немере, 5 шөбере сүйіп отыр.
– Қандай қиыншылық көрсең де, отбасындағы сыйластықты сақтауға тырысу керек, – дейді Ханзада апай.
– Жігер, отбасына деген адалдық, елге деген сүйіспеншілік керек, – деп толықтырды Айтбай ағай.
Ұлттық байқауда «Парасатты отбасы» мен «Өнегелі отбасы» аталымдарына 150 мыңның, ал «Мерейлі отбасы» аталымына ие болған Мұздахановтарға 300 мың теңгенің сертификаты тапсырылды. Жеңімпаз отбасы маусым айында Астанада өтетін республикалық «Мерейлі отбасы» байқауына қатысады.
Нәзира Жәрімбетова,
«Егемен Қазақстан»
Қостанай облысы
