Бюджет жобасы таныстырылды

Кеше Парламент Сенатында палата Төрағасының орынба­сар­лары Мұхамбет Көпеев пен Александр Судьиннің қаты­суы­мен және Қаржы және бюджет комитетінің басшысы Қайрат Ищановтың төрағалық етуімен «2011-2013 жылдарға арналған республикалық бюджет туралы» Қазақстан Республикасының заңына өзгерістер мен толықтырулар енгізу туралы» заң жобасының таныстырылымы болды. Қаржы министрі Б.Жәмішев пен Экономикалық даму және сауда министрі Қ.Келімбетов де­пу­тат­тардың алдында сөз сөйлеп, әлеу­меттік саланың, ауыл шаруа­шы­лы­ғының, аймақтық инфақұ­ры­­лым­­ның нысандарын салуды бюд­жет­тік қолдау мәселелеріне қатыс­ты көптеген сауалдарға жауап берді. Таныстыру барысында 2011-2015 жылдардағы макроэконо­ми­ка­лық болжам көрсеткіштерінің өзгеруіне байланысты 2011 жыл­ғы республикалық бюджеттің көр­сеткіштері нақтыланып отыр­ғаны аталып өтілді. Республикалық бюджеттің би­ыл­ғы түсімдері 4 439,9 миллиард теңге көлемінде белгіленді немесе қазіргі бюджетпен салыстыр­ған­да (4 256,6 миллиард теңге) 183,3 миллиард теңгеге ұлғайды. Бекітілген бюджетпен салыс­тырғанда бюджет жетіспеушілігі қосымша қаржымен 34,6 миллиард теңгеге ұлғайтылып, оның нәтижесінде дефицит 730,4 миллиард теңгені құрады. Нәтижесінде 2011 жылғы рес­публикалық бюджет шығыстары 5 170,3 миллиард теңге сома­сын­да қарастырылып отыр, бекітілген бюджетпен (4 952,4 миллиард теңге) салыстырғанда 217,9 миллиард теңгеге ұл­ғайды. Бюджетті нақтылаулар әлеу­меттік саланы, ауыл шаруашы­лы­ғын, тұрғын үй-коммуналдық кешенін дамыту, индустриялық-инновациялық бағдарлама мен аймақтық инфрақұрылым құры­лы­сын іске асыру шығыстарын ұлғайтуды көздейді. Тұтастай алғанда, 2011 жыл­ғы республикалық бюджетті нақ­тылау жобасы Президент Н.На­зарбаевтың халыққа Жолдауында белгіленген және биылғы 17 сәуірдегі Үкіметтің кеңейтілген отырысында алға қойған міндеттерді ескере отырып, әзірленген, деп хабарлады Парламент Сена­ты­ның баспасөз қызметі.