Павильондар да, қызметкерлер де дайын
«Соңғы бірнеше апта бойы біз көптеген оқу-жаттығу өткізіп, төтенше жағдайларға дайындық жүргіздік. Негізгі дайындық барысына көрменің бүкіл аумағы жұмылдырылды. Айта кетерлігі, 10 маусымға дейін көрме аумағы келушілер үшін жабық болады», дейді басқарушы директор. Халықаралық қатысушылармен жұмыс департаментінің директоры Ілия Оразақов қатысушылардың 126 мың шаршы метр павильоны толық дайын екендігін айтты. «Қазіргі уақытта төрт-бес ел ғана қалды. Олар өздерінің құрылыс-монтаж жұмыстарын аяқтайды. Біз халықаралық қатысушылардың операциялық құрамын дер уақытында жасақтадық. Әрбір павильонның 30-дан 150-ге дейін қызметкері бар. Олардың барлығы Астанада, жұмыстарында белсенді, дейді ол.
Ұйымдастырушылардың сөзінше, жоспарланған іс-шаралар толық көлемде орындалған. Қажетті құрал-жабдықтар сатып алынып, орнатылған. Бейнебақылау, дабыл және кіріп-шығуды басқару жүйелері жүз пайыз дайын. Қауіпсіздікті қамтамасыз етуге жұмылдырылатын қызметкерлер – құқық қорғау органдары мен жеке күзет құрылымдарының қызметкерлері қажетті оқыту курсынан, тілдік дайындықтан өтті. Жексенбілік топтар бір сағаттың ішінде шамамен 13 мың адамды қабылдай алады. Бұл ретте күту уақыты 30-40 минуттан аспайды.
Сервистік қамтамасыз ету департаментінің директоры Дияс Әзбергеновтің айтуынша, көрме аумағында орналасқан 7 медициналық бекет пен 8 жедел жәрдем көлігі тұрақты түрде кезекшілік атқарады. Шара барысында жұмылдырылатын 210 медициналық қызметкердің қатарында дәрігерлер, фельдшерлер, реаниматологтар бар.
Көрмеге неше адам келеді?
Көрмеге келетін қонақтар мен туристердің нақты саны көп көңілін күпті қылып жүрген. Ұйымдастырушылардың мәліметіне сенсек, көрмеге 2,4 миллион адам келеді екен. Олардың 15 пайызы шетелдік турист болуы керек.
«Тәжірибеге сүйенсек, көрмеге келушілер саны болжамның 70-80 пайызы болады. Ал біздің жағдайымызды бұл көрсеткіш 85 пайызды құрамақ. Оның 15 пайызы – шетелдерден келетін қонақтар. Мөлшермен айтқанда адамдар саны 600-ден 750 мыңға дейін болады. Көрмеге келетін туристердің 70 пайызы жақын шет елдерден болатыны айтпаса да түсінікті. Олар негізінен біздің көршілеріміз. Бүгінгі таңда Қытайдан шамамен 150-200 мың қонақ келеді деп күтілуде. Өйткені, қытайлық туризм агенттіктері бұл шараға қатты қызығып отыр. Тағы 150-200 мың қонақ Еуропа, Солтүстік Америка сияқты аймақтардағы мемлекеттерден келеді. Өкінішке орай, ішкі бөлініс қалай болатынын айта алмаймыз», дейді «Астана ЭКСПО -2017» ҰК» АҚ Халықаралық қатысушылармен жұмыс департаментінің директоры Илия Оразақов.
Қазіргі таңда қандай мемлекеттен қанша адам билеттерді сатып алып жатқаны анықталуда. Жалпы, мұны қадағалау қиын процес көрінеді. Өйткені, ол белгілі бір оператор арқылы жүзеге асырылады екен. Сондықтан бұл мәлімет кейін тағы хабарланбақ.
Биылғы жәрмеңке ЭКСПО-ға бағышталған
Ел өңірлерінің Астанадағы ауылшаруашылық жәрмеңкесі биыл ЭКСПО-2017 көрмесіне орайластырылған. Дәстүрлі шараның көрігін өткен аптада Қызылорда, Атырау, Батыс Қазақстан облыстарының диқандары қыздырды. Өңірлік тауар өндірушілер «Қазақстан» спорт сарайының аумағына орналасқан 24 сауда шатырында 500 тоннаға жуық өнім ұсынды. «Мемлекет басшысының тапсырмасымен және Үкімет шешімімен Ауыл шаруашылығы министрлігі халықаралық көрме кезінде Астанаға жеткізілетін ауылшаруашылық өнімдерінің көлемін арттыруды шешкен-тін. Елорда әкімдігімен бірлесіп, қажетті өнімдердің көлемін есептедік. Жалпы есеп бойынша 120000 тонна қажет. Қазіргі таңда кесте құрылып, барлық облыстармен келісімге қол қойылды», дейді Ауыл шаруашылығы вице-министрі Төлеутай Рахымбеков.
Бас қала тұрғындары мен қонақтарына қажет тауарлардың 81000 тоннаға жуығын дәстүрлі ритейлерлер әкелетін болса, қосымша 39000 тоннасы тұрақты жәрмеңкелер арқылы жеткізілмек. Мұндай жәрмеңкелерге қатысуға елдің әр өңірінен 600 мың тауар өндіруші ниет білдірген көрінеді. «Биылғы маусымда қала тұрғындары мен қонақтары үшін ауылшаруашылық өнімдеріне тапшылық болмайды», деп сендірді вице-министр. Шенеунік бағаны реттеу мәселесі де тұрақты қадағалауда болатынын жеткізді.
«Бізге өнімдерді жеткізу, логистика және сауда орындарын ұсыну бойынша Астана әкімдігі үлкен қолдау танытуда. Осы жолы Қызылорда облысынан 45 млн теңгенің 200 тоннадан астам өнімін жеткіздік. Жәрмеңкеге 40 тауар өндіруші қатысты. Дәстүр бойынша, 112 тонна күріш, көкөніс, балық және кондитерлік өнімдер ұсындық. ЭКСПО кезеңінде жалпы 7648 тонна өнім әкелеміз деп жоспарлаудамыз, олардың басым көпшілігі – күріш, балық өнімдері және бақша дақылдары», дейді Ауыл шаруашылығы басқармасының басшысы Бақыт Жақанов.
Маусымның 11-12 күндері өңірлік ауылшаруашылық жәрмеңкесін Атырау мен Жамбыл облыстары жалғастырады.
Асхат РАЙҚҰЛ,
«Егемен Қазақстан»
Суреттерді түсірген
Ерлан ОМАРОВ,
«Егемен Қазақстан»
