Отырысқа комиссия мүшелері – республикалық бұқаралық ақпарат құралдарының, шығармашылық бірлестіктердің, журналистердің қоғамдық ұйымдарының және мүдделі мемлекеттік органдардың өкілдері қатысты. Басқосуда Мемлекеттік хатшы Қазақстанның мемлекеттілігін нығайтудағы бұқаралық ақпарат құралдарының маңызды рөлін атап өтті.
«Бүгінгі кездесуіміз қоғам өмірінің барлық саласын жаңғыртуға бағытталған институттық реформалардың тереңдей түскен жауапты кезеңінде өтіп отыр. Мемлекет басшысы белгілеген Қазақстанның озық дамыған 30 елдің қатарына қосылу жөніндегі стратегиялық міндеттері отандық БАҚ-қа деген зор сұраныс тудырып, ерекше рөл атқаруды талап етеді. Журналистердің кәсіби мерекесіне орай, жыл сайынғы ақпарат саласының үздіктерін белгілейміз. Бұқаралық ақпарат құралдары саласындағы Президент сыйлығын беру, грантын тапсыру және Алғысын жариялау – баспасөз өкілдері асыға күтетін дәстүрлі іс-шарамыз. Елбасының журналистерге арналған сыйлығы мен гранты алғаш рет 1997 жылы берілді. Содан бері, міне, 21-рет өткізілгелі отыр», – деді Г.Әбдіқалықова.
Мемлекеттік хатшы, сондай-ақ, ақпараттық қолдау мемлекеттік саясатты және ел ішіндегі реформалар бағытын тиімді іске асырудың маңызды талаптарының бірі болып табылатынына тоқталды.
«Жаһандану процесі белең алған қазіргі заманда баспасөздің бәсекеге қабілетті болуы – маңызды міндеттердің бірі. Сондықтан Мемлекет басшысы Нұрсұлтан Назарбаев БАҚ өкілдерінің, бұқаралық ақпарат құралдарының жұмысына аса көңіл бөледі және арнайы қолдау білдіріп отырады. Осыған байланысты мемлекеттік сыйлық пен гранттар белгіленген. Биыл Елбасының «Болашаққа бағдар: рухани жаңғыру» атты тарихи мақаласы жарияланды. Қоғамдық сананы дамыту мен рухани жаңғыруды іске асыруда БАҚ өкілдерінің де рөлі орасан зор», – деді Г.Әбдіқалықова.
Мемлекеттік хатшы таяу күндері Астанада ЭКСПО-2017 көрмесі өз жұмысын бастайтындығын, оның жұмысын көрсетуде, насихаттауда БАҚ өкілдерін үлкен жұмыс күтіп тұрғанын тілге тиек етті. Сондай-ақ, биылғы Қоғамдық комиссияның отырысында журналистік материалдар деңгейінің жоғары екені айтылып, Қазақстан дамуының маңызды қоғамдық-саяси және әлеуметтік-экономикалық аспектілерін жария етудегі медиа қоғамдастығы өкілдері үлесінің зор екендігі назардан тыс қалмады.
Талқылау қорытындысы бойынша Қоғамдық комиссия ашық дауыс беру арқылы, БАҚ саласындағы президенттік сыйлықтарды тапсыру ережесіне сәйкес, БАҚ өкілдеріне екі сыйлық және екі грант бөлу, төрт шығармашылық ұжымға Президент Алғысын жариялау жөнінде Мемлекет басшысына ұсыным жасауға бірауыздан қаулы етті.
Нұрлыбек ДОСЫБАЙ,
«Егемен Қазақстан»
