– Бұл сіздің көптен күткен әрі ең маңызды жекпе-жегіңіз ғой?
– Әлбетте солай. Бұл кездесуді күтіп жүргеніме екі жылдың көлемі болып қалды. Енді сол күнді асыға күтіп жүрмін.
– «Канело» секілді соққысы күшті боксшымен кездесіп пе едіңіз?
– Жоқ, мен жұдырықтасқан чемпиондардың арасында Альварес секілді мықты боксшы болған емес.
– Оған қарсы қалай дайындалмақсыз?
– Бапкерім Абель Санчестің құрған жоспары бар. Сондықтан жаттығуымда «Канелоның» стиліне байланысты өзгерістер де болып қалуы мүмкін. Сауль екеуіміз төрт жыл бұрын бірге жаттыққанбыз. Бір-бірімізді білеміз.
– Естуімше, сіздер спарринг өткіздіңіздер ғой? Оны нокаутқа түсіре алдыңыз ба?
– Иә, шамамен төрт жыл бұрын жаттығу кезінде күш сынасқанымыз бар. Ол мықты боксшы. Спарринг кезінде оны нокаутқа түсіре алмадым, бірақ 16 қыркүйекте нокаутқа жіберем деп ойлаймын.
– Демек, бұл жекпе-жек нокаутпен аяқталады деп ойлайсыз ғой? Әлде жеңімпаз төрешілердің шешімімен анықтала ма?
– Ол жағын білмеймін. Бұл бокс. Екеуіміз үшін үлкен жекпе-жек болмақ. Альварес те, мен де нағыз драма көрсетуге ұмтыламыз деп ойлаймын.
– Альварес өзіңіздей соққысы күшті боксшымен кездесті ме?
– Жоқ, олай ойламаймын.
– Соққыларыңызды сезінгенде ол таң қалады деп ойлайсыз ба?
– Қатты таң қаларына сенімдімін (күлді).
– «Канелоның» кіші Хулио Сезар Чавеспен өткізген жекпе-жегі жайлы қандай ойдасыз? Бұл кездесуде оның осал тұстарын байқадыңыз ба?
– Бұл кеште мүлдем басқа нәрсені ойладым. «Канело» оны соққыларының астына алғанмен, нокаутқа түсірмеді. Маған осы жайт аздап түсініксіздеу болды. Кіші Чавесті құлату керек еді деп ойлаймын.
– Альварес-Чавес кездесуінде бір байқағанымыз, раунд арасындағы үзілістерде «Канело» орындыққа отырмады. Бейне бір жекпе-жекті дем алмай аяқтауға болатынын көрсеткісі келгендей болды.
– Онысы клоунада ғой. Бойына сыймай бара жатса, күшін келесі раундта көрсету керек еді. Бірінші раундта болмаса, екінші раундта қарсыласын есінен тандырып тастасын. Сонда мойындауға болады.
– Сізді Қазақстанда маңызды шаралар күтіп тұр. Биыл ол жақта Халықаралық ЭКСПО көрмесі өтеді. Көрменің елшісі міндетін атқарасыз. Бұл сіз үшін үлкен мәртебе болар?
– Әрине. Мұндай ауқымды шараны өткізудің маңызы зор. Көрмеде соңғы экологиялық технологиялар, жаңа энергияның көздері таныстырылады. Осының бәрін бүкіл әлемге таныстыру мүмкіндігі пайда болғанын мақтан тұтамын.
– Қазір жанкүйерлер арасында кіші Флойд Мэйуезер мен Конор Макгрегор айқасы қызу талқыланып жатыр. Олардың айқасы Альварес екеуіңіздің жекпе-жегіңізге бәсекелес болмай ма? Мэйуезер-Макгрегор кездесуіне қарағанда Головкин-Альварес жекпе-жегі не үшін маңыздырақ?
– Себебі, біздікі нағыз жекпе-жек. Меніңше, Мэйуезер-Макгрегор кешінде ешқандай интрига жоқ. Бұл Конор үшін тиімді болары сөзсіз. Өзінің отбасына, болашағына қажет көбірек ақша табады. Бірақ спорт жағынан алып қарағанда ешқандай қызық жоқ.
– Шаршы алаңда кіші Мэйуезермен кездесуіңіз мүмкін бе?
– Жоқ, олай ойламаймын. Себебі, бұл мүмкін емес.
– Ал ары қарай не болмақ? «Канеломен» өтетін кездесуден кейін қандай жоспарыңыз бар?
– Алдымызда екі жол тұр. Бірі – реванш өткізу, ал екіншісі мен орта салмақтағы барлық белбеуге иелік еткім келеді. Бұл менің арманым.
