Көрмені Мәдениет және спорт министрі Арыстанбек Мұхамедиұлы ашты. ЭКСПО қарсаңында өткізіліп отырған алғашқы мәдени шараның Ерболат Төлепбайдың көрмесі болғаны өте қуанышты жайт. Бүгінде суретшіні дүние жүзіндегі өнерсүйер қауым таниды, бағалайды. Іссапармен шет елдерде болғанымда суретшінің картиналарының әлемдегі ең мықты галереяларда тұрғанын көрдім. Бұл біз үшін мақтаныш», деді министр. Ал, Сыртқы істер министрі Қайрат Әбдрахманов, академик Мырзатай Жолдасбеков, Сенат депутаты Бірғаным Әйтімовалар суретшінің өнері туралы өз ойларымен бөлісті.
Е.Төлепбайдың туындылары Қазақстан, ТМД елдері, Еуропа, Америка және Азия елдерінің музейлерінде, галереяларында сақтаулы. Әлемнің қырықтан аса елінде жеке көрмесін өткізген суретшінің елордадағы «Бес күн» атты көрмесі де өзіндік ерекшелігімен дараланды. Көрме не үшін «Бес күн» аталды? Неге оны анасына арнады? Қолтаңбасының өзгешелігімен, бояуының айқындығымен ерекшеленетін суретшінің дүниеге, тіршілікке, адами қарым-қатынастарға деген көзқарасына анасының ықпалы зор болған сияқты. Суретші былай дейді: «Анам марқұм өмір бойы емшілікпен айналысты. Ұлдар еді есімі. Ол кезде біз баламыз. Күнде таңертең ұйқыдан тұрып, таңертеңгі шәйді ішейік десек, үйде кемінде 10-15 бейтаныс кісі отырады. Біз отбасы болып оңаша шәй ішіп көрмеппіз. Анам айтатын адамдар арасындағы қарым-қатынас, жарық дүние мен о дүние туралы әңгімелер құлағымда қалып қойыпты. Өз ішкі дүнием мен өзгелердің, жалпы түрлі-түрлі адамдардың ішкі дүниесін салыстыру қасиеті бала күнімнен қалыптасты. Көрмедегі жұмыстарым осы тақырыптың айналасында».
Көрмені тамашалау барысында өнер иесінің әйелдің өмірдегі миссиясын ерекше сезімталдықпен, пәлсапашылдықпен бояу тіліне көшіргеніне тәнті болдық. Ол бейнелеген кейіпкерлердің барлығы да түрлі-түрлі көңіл-күймен өзіне баурайды. Бір суреттегі ана, екінші бір суреттегі келін, үшінші бір «Аспанға ұшу» атты суреттегі жас бойжеткен, «Реніш», «Үміт», «Ажырасу» не «Алғашқы махаббат», «Жас жұбайлар» атты картиналардағы кейіпкерлердің барлығы да сезімтал, сергек, өмірге құштар бейнелер. Бес күн жалғандағы шынайылық пен ізгіліктің нақ өзіндей әсер қалдырады.
Суретшінің айтуынша, бұл өмірде трагедия жоқ. Табиғат әлемі де, жан-жануарлар, аң-құстар әлемі де сондай үйлесімді, керемет. Ал адамдар астамшылық жасайды, күнәға батады. «Адамдардағы ізгілікті ояту үшін тек дін адамдары ғана емес, өнер адамдары да еңбек етсе, біз келешегімізді жақсартамыз ғой деп ойлаймын. Қазақтың өнері өзге елдердің ешқайсысының да өнерінен кем емес», дейді суретші. Жалпы, көрмеге жиылған жұртшылық Ерболат Төлепбайдың шынайы ой-толғамдарына да, туындыларына да ризашылық танытқанына куә болдық.
Көрмеден алған әсерімен Мәжіліс депутаты Сауытбек Абдрахманов былайша бөлісті:
– Көрменің атының өзі көп-көп ойға қалдырады. Абайдың «Уайым – ер қорғаны, есі барлық. Қиыны бұл дүниенің – қолы тарлық. «Еһе-еһеге» елірме бозбалалар, Бұл бес күндік бір майдан ер сынарлық» деген сөзі бар. Ерболаттың анасы да ұлына: «Бұл бес күндік дүние, өтеді де шығады», деп айтып отырады екен. Суретші көрмесі осы бес күндік (аптаға да толмайтын!) дүниенің сан сырын сан қырынан айқара ашып беруімен жүрек толқытады.
Айгүл Сейілова,
«Егемен Қазақстан»
Суреттерді түсірген
Ерлан Омаров,
«Егемен Қазақстан»
