29 Қыркүйек, 2011

Нақты тапсырмалар берді

380 рет
көрсетілді
4 мин
оқу үшін
Кеше Мемлекет басшысы Қарағанды облысының әкімі Серік Ахметовті қабылдады, деп хабарлады Қазақстан Республикасы Президентінің баспасөз қызметі. С.Ахметов Мемлекет басшысын облыстың әлеуметтік-экономикалық дамуы жөнінде ағым­дағы жылы атқарылған жұмысы туралы хабардар етті. 8 айдың қорытындысы бойынша өнер­кә­сіп өнімі өндірісінің көлемі 870 млрд. тең­геден асты. Бұл ретте 2011 жылдың соңында айғақты көлем индексі 105 пайыз болады деп күтілуде. Қарағанды облысы үдемелі индус­трия­лық-инновациялық даму бағдарламасы аясындағы жобаларды іске асыру бойынша еліміздің өзге өңірлері арасында көш бастап келеді. Индустрияландыру картасына өңірден жалпы сомасы  282,2 млрд. теңге 45 жоба енгізілді, 5 мыңнан аса жұмыс орны құры­ла­тын болады. Жыл басынан бері жалпы сома­сы 4 млрд. теңгені құрайтын 9 жоба іске қо­сылды, 507 жұмыс орны құрылды. Биылғы жылдың соңына дейін 42 млрд. теңгеден астам сомаға 15 инвестициялық жоба жүзеге асы­рылып, 1350 жұмыс орны ашылатын бо­лады. Олардың арасында «Сары Қазына» ЖШС катодты мыс өндіретін зауыт құ­ры­лысы, «Хром-Т» ЖШС ферроқұйма өндірісі кешені, №2 домна пеші мен «Арселор Миттал Теміртау» АҚ әзірлемелерді үздіксіз құю ма­ши­насы, «ҚазАвиаСпектр» ЖШС ауыл ша­руашылығы ұшақтарының өндірісі, Қара­ған­ды ЖЭО-3 жаңғырту және қуаттылығын арт­тыру жөніндегі мәні зор жобалар бар. Соны­мен қатар, облыс «Бизнестің жол карта­сы-2020» мемлекеттік бағдарламасын іске асыру бойынша да бірінші орында келеді. Бұл жұмыста өңірде әзірленген базалық сала­лар­ды дамыту тұжырымдамасы негізгі құрал бо­лып табылады. Бүгінгі күнге дейін бағдар­лама аясында несиелерді субсидиялау мен кепілдендіру бойынша 14 млрд. теңгеден аса сомаға 87 жоба мақұлданды. Осының арқа­сында 10 мыңға жуық жұмыс орны сақталып, 2 мыңнан астам жұмыс орны жаңадан ашыл­ды. Қарағанды облысының 2010-2015 жыл­дар­ға арналған энергия үнемдеу бойынша кешенді жоспары қабылданды. Аталған құжат коммуналдық жүйелерді үнемді пайдалануға байланысты отандық әзірлемелерге негізделген. Күтілетін деректер бойынша ағымдағы жылдың 9 айында ауыл шаруашылығы өнім­дерінің жалпы көлемі 69,7 млрд. теңгені құрайтын болады. Бұл – 2010 жылдың сәйкес кезеңімен салыстырғанда 18,7 пайыз артық. Ел Тәуелсіздігінің 20 жылдығын атап өтуге байланысты шаралар шеңберінде об­лыста елді мекендердің инфрақұрылымын дайындау, абаттандыру, көгалдандыру бойын­ша ауқым­ды жұмыстар атқарылуда. Бүгінге дейін мына нысандар, атап айтқанда, облыс­тық қан ор­та­лығы, Қарағанды қаласындағы нәресте орта­лығы, Шахтинск қаласындағы саяси қуғын-сүргін құрбандарын есте сақтау мұражайы, балабақшалар, тұрғын үйлер, сая­бақтар, спорт алаңдары, мәдениет қайрат­керлерінің ес­керткіштері пайдалануға берілді. Тәуел­сіздік мерейтойы қарсаңында теннис орта­лы­ғы, мұз айдыны, бокс орталығы, 4 мың орын­дық мешіт, кардиохирургиялық орта­лық­тың жаңа блогы, емхана, Теміртау қала­сын­дағы та­рихи-мәдени орталық, Қарағанды қа­ласын­да Қазыбек бидің, Қаныш Сәтбаевтың ескерткіштері және басқа да нысандар ашылатын болады. Тек соңғы 10 жылдың ішінде Қара­ған­ды облысында тұрғындардың орташа ай­лық ақшалай кірістері 6 есеге артты, ал кіріс мөлшері күнкөріс шегінен төмен тұрғындар үлесі 39 пайыздан 3 пайызға төмендеді. Есеп қорытындысы бойынша Мемлекет басшысы Қарағанды облысының әкіміне өңір­ді әлеуметтік-экономикалық жағынан одан әрі дамытуға қатысты нақты тап­сыр­малар берді.