Қазір ЭКСПО-2017 көрмесінің «Болашақтың энергиясы» атты тақырыбы жалпы жұртшылыққа етене таныс, түсінікті ұғымға айналған. Ауаны ластамай көлік жүргізу, электр энергиясын көмір жақпай, органикалық қалдықтардан өндіру, экологиялық таза азық алу – осы тоқ бәйгеге қосылу емес пе?
– Әлемнің әр түкпірінен көрмені тамашалауға келгендер Қостанай облысынан қойылған 4 жобаны көзі шалады деп ойлаймыз. Қарасу ауданындағы «Қараман и К» жауапкершілігі шектеулі серіктестігінде сиыр тезегінен өндірілген электр энергиясы шаруашылықтың бүкіл қажетіне жарап, оның сыртында ауылды жарықтандырып отыр. Тезектен газ, одан электр энергиясы өндіріледі. Ешқандай көмір де, жер астынан алынған газ да, мұнай да керек емес! « S.M.F. Sistem» мата емес материалдар фабрикасы» кәдімгі жер-көкті алып жататын полиэтилен ыдыстарын өңдеп, синтепон, геотекстиль жасайды. Ал атақты «СарыарқаАвтоПром» машина жасау зауыты электр энергиясымен жүретін JAC электромобиль жеңіл машинасын шығаруды бастады. «Тұрар» сүт фермасының инновациялық қадамдары жерді органикалық өңдеуге, экологиялық таза өнім өндіруге бағытталған, –дейді облыстық кәсіпкерлік және индустриялық-инновациялық даму басқармасының бөлім басшысы Талғат Көтенбаев. Жақында ғана «СарыарқаАвтоПром» зауытынан құрастырылған, сыры кеппеген 20 автобус ЭКСПО-ға қызмет етуге аттанды. Ол автобустардың дизельмен де, газбен де жүре беретін ерекшелігі бар. Желдің қуатын пайдалану, инфрақұрылым, ауыл шаруашылығы, балық аулау кәсібі, қалдықтарды жою, тазалау жүйесі, су энергетикасы, технология, энергияны тиімді пайдалану жөніндегі жобалар ЭКСПО қонақтарына интерактивтік тақталар арқылы ұсынылады.
Наурызым мемлекеттік табиғи қорығының атына қазір дүние жүзі қанық десек артық айтқандық емес. 2008 жылы бұрын осы табиғат маржаны ЮНЕСКО-ның Бүкіләлемдік мұралар тізіміне енгізілген болатын. Қорық «Recommended by EXPO» туристік маршруттар тізіміне енді. Демек, ЭКСПО-ға келетін туристер арасында осы табиғат тамашасын бір көріп кетуге ынтызарлар да табылар. «BEST kz» туристік агенттігінің директоры Гүлмира Қапенованың айтуына қарағанда, Наурызым қорығы ЭКСПО-ға жан-жақты дайындалды. Онда жергілікті кәсіпкер биыл қонақүй салды, даланың әсемдігін көргісі келген туриске логистика жөнінен қолайлылықтың бәрі бар.
– Наурызымға келген турист алдымен дүниенің басқа жерінде кездеспейтін селеулі даланың сұлулығын және қазақ халқының алуан түрлі, бай дәстүрін тамашалайды, ұлттық тамағы тіл үйіретін дастарқанынан дәм татады. Қазірдің өзінде қытай туристері Наурызымға қызығушылық танытып отыр. Алайда, олар экскурсияны этностық қытай жүргізсе деген талап-тілегін жеткізіп жатыр. Шетелдік туристер үшін Наурызымға алты орындық ұшақпен екі күндік авиатур ұсынылады. Ол әр туристке 510 долларға түседі, ал автокөлікпен баратын джип-турдың құны 13500 теңге тұрады, – дейді Гүлмира Қапенова.
Жалпы, қостанайлық туристік агенттіктер шетелдік туристерге 26 түрлі туристік бағыт дайындады. ЭКСПО өтетін 93 күнде Қостанай облысы Астанада үш рет, яғни 24-25 маусымда, 22-23 шілдеде және 26-27 тамызда азық-түлік жәрмеңкесін өткізеді. Осы үш жәрмеңкеде Астанаға 1800 тонна азық-түлік жеткізіледі. ЭКСПО аясында елордада облыстардың мәдениет күндері өтетіні белгілі. Тамыз айының 5-і мен 9-ы аралығында Астана мен қала қонақтары қостанайлық өнерпаздардың, қолөнершілердің, суретшілердің өнеріне куә болады. Облыстан аттанған 100 волонтер қазір ЭКСПО-ға қызмет етуді бастап та кетті.
Еліміздің әлем алдындағы беделін, абыройын асқақтатар көрменің жақсы өтуіне осылай атсалысатын қостанайлықтар атақты шараның қызығынан да қалмайды. Бүгінге дейін облыс тұрғындары ЭКСПО-ға 32000 билет сатып алды. 16 мыңнан аса мектеп оқушылары, 11 мыңнан аса жоғары оқу орындары мен колледждер студенттері каникулда ЭКСПО-ны тамашалайды. Қостанайлық спортшылар Астанада өтетін республикалық, халықаралық спорт жарыстарына қатысады.
ЭКСПО-2017 халықаралық көрмесі қостанайлықтардың елге, жерге, Отанға деген асқақ рухын көтерді.
Нәзира ЖӘРІМБЕТОВА,
«Егемен Қазақстан»
ҚОСТАНАЙ
