Конгресті ашқан «Атамекен» ҰКП Іскер әйелдер кеңесінің төрайымы Ләззат Рамазанова еліміздің қазіргі дамуында белсенді қыз-келіншектердің орны барған сайын маңызды бола түскендігін атап көрсетті.
«Бүгінде еліміздің ішкі жалпы өнімін қалыптастырудағы әйелдер қауымының үлесі 40 пайызға дейін жетіп отыр. Әрбір өңірде іскер әйелдер кеңесі құрылып, жұмыс істеуде. Бүгінгі конгреске қатысып отырған іскер әйелдер, әсіресе еліміздің әр аймағынан келген қыз-келіншектер ер адамдармен бірдей жұмыс атқарып, бизнестегі өз орындарын айқындай білді. Соның ішінде облыстардағы іскер әйелдер кеңесі орталық пен шалғай аймақтардың арасын байланыстырушы буын ретінде әрекет етіп келеді. Бүгінде бизнес-леди атауы қоғам тарапынан қызығушылық тудыратындай зор мәртебеге ие болуда. Еліміздің ынталы қыз-келіншектерін осы қатардан көрінуге шақырамын», деді Ләззат Керімқұлқызы.
Конгреске «Атамекен» ҰКП Төралқа төрағасы Тимур Құлыбаев қатысып құттықтау сөз сөйледі. Ол әйелдер қауымының еліміздегі кәсіпкерлік саланың қалыптасып, дамуына үлкен үлес қосып келе жатқандығын атап өтті.
«Атамекен» ҰКП Басқарма Төрағасының орынбасары Юлия Якупбаева «Қызмет көрсету саласындағы МЖӘ жобасы маңызы» туралы баяндама жасап, жан-жақты әңгімелеп берді.
Конгресте алғашқылар қатарында сөйлеген Оңтүстік Қазақстан өңірлік іскер әйелдер кеңесінің төрайымы, «Асыл Арман» ЖШС директоры Алма Архабаева бизнес құрудың ерекшеліктерін айтып, іскер нарықтағы өміршеңдік қағидаттарын тізді. «Басқарушылық – бұл өнер. Уақытты басқару – болашақты басқару дегеніміз бизнесті басқару, ақпаратқа ие болу. Басқа адамдардың уақытын бағалау, командаға дұрыс адамдарды таңдай білу, отбасы мен жұмыс арасында теңгерімді ұстай білу өте маңызды. Қоғамда әйел іскер болса, мансап қуса, отбасын құра алмайды немесе басқа істі құрбан ету керек деген пікір бар. Мен бұл пікірмен келіспеймін. Бұған өз өмірім мен тәжірибемді мысал ретінде келтіре аламын. Менің бес балам бар. Мен олардың болашағы үшін бизнеске араластым», деді Алма Архабаева.
Оның айтуынша, іскерлікте негізгі төрт қағида бар. Біріншісі – уақыт. Уақытты дұрыс жұмсай білудің бизнестегі маңыз зор. Екіншісі – қаржы. Ақшасыз экономиканы қалыптастыру, жеке бизнесті құру мүмкін емес. Үшіншісі – өмір энергиясы. Мұнда денсаулық пен психологиялық жағдайды ұмытпаған жөн. Төртіншісі – теңгерім, бәріне де теңгерім сақтаған абзал.
Басқосуда Шығыс Қазақстан облысындағы іскер әйелдердің өңірлік кеңесінің жетекшісі Елена Березинская-Абилова өздерінің аз уақытта жинаған мол тәжірибелерін ортаға салды.
«Шығыс Қазақстан облысындағы іскер әйелдердің өңірлік кеңесі 2015 жылы құрылды. Соған қарамастан облыстың бизнес саласындағы құрылымдарымен іскерлік байланысымызды жақсарта отырып, көптеген жұмыстар тындырдық. Бүгінде аудандық деңгейдегі 15 кеңесіміз жұмыс істейді. Кәсіпкерлікпен шұғылданғысы келетін жастарға көмек көрсетіп, тәжірибемізбен бөлісуді өзіміздің басты парызымыздың бірі деп білеміз. Біз өзімізді әйелдердің кәсіпкерлік белсенділігін жүзеге асыратын алаң ретінде құрдық», деді ол.
«IDFashhion» халықаралық телеарнасының бас продюсері Василий Климчук бизнес құрудағы медиа мүмкіндіктерді айтты. Телеарнаның басты миссиясы – қазақстандық дизайнерлерге өз қазанында ғана қайнамай, халықаралық кеңістіктен өз орындарын алуына көмек көрсету. «Біз оларға сән әлемінің үлкен нарығына, фешн кеңістігіне жол ашамыз. Үлкен сауда алаңына, сонымен қатар киімдерді көп мөлшерде сатуға мүмкіндік беретін байланыстарға шығуға көмектесеміз. «IDFashhion» халықаралық телеарнасы – бұл жаңа мүмкіндіктер, жаңа таныстар, жаңа деңгей», деді телеарна өкілі.
Конгресс барысында сондай-ақ, Қазақстан Президенті жанындағы Отбасы және әйелдер істері жөніндегі ұлттық комиссиясы Төрайымының орынбасары Ләззат Сүлеймен, «ҚазГЮУ» университеті» АҚ Басқарма төрағасының орынбасары Надежда Коробко, Жамбыл облысы Жастар кәсіпкерлігі кеңесі орталығының директоры Айнұр Зәуірбекова, Маңғыстау облысы Өңірлік іскер әйелдер кеңесінің төрайымы Сәуле Салихова сөз алып, іскер әйелдердің бүгінгі аяқ алысы жайлы өз ойларын ортаға салды.
Бүгінде мемлекеттік органдарда, шағын және орта бизнес саласында іскер әйелдер үлесі артып келеді. Жалпы әйелдер қауымының отандық бизнес ортадағы белсенділігі шамамен 50 пайызға жуықтаса, еліміздің ішкі жалпы өнімін қалыптастырудағы қосып отырған үлестері 40 пайызға жетіп отыр. Қазақстандағы әйелдер кәсіпкерлігінің басым бөлігі қызмет көрсету саласына бағытталған, сервистік қызмет көрсетудің 63 пайызы әйелдерге тиесілі, ауыл шаруашылығындағы кәсіптің 53 пайызын нәзік жандылар басқаруда.
Еліміздің шағын және орта кәсіпті 697 355 әйел дөңгелетіп отыр. Кәсіпкерлік саласына қаржылай емес қолдау көрсету бойынша «Атамекен» ұлттық кәсіпкерлер палатасы кәсіпкер әйелдерге 17 666 сервистік қызмет көрсетсе, 45 501 ақпараттық қолдау білдірген.
Шара барысында ел дамуына сүбелі үлес қосқан іскер әйелдер «Атамекен» ҰКП Іскер әйелдері кеңесі атынан марапатқа ие болды.
Сұңғат ӘЛІПБАЙ,
«Егемен Қазақстан»
