Әсіресе, Щучье-Бурабай курортты аймағы қонақтарды қабылдайтын маңызды нысандардың бірі болып табылады. Осыған орай облыстың туристік операторлары тарапынан көрсетуге лайық деген 30 туристік бағдарларды ұсынатын 7 туристік пакет ұсынылуда. Тіпті, бұл үшін үш тілді еркін меңгерген азаматтар арасында таңдау да жүргізілді. Сондай-ақ, бұдан басқа Щучье-Бурабай курортты аймағындағы туристерді қабылдап, қызмет көрсете алатын 100 нысанның 12-сі «Recommended by EXPO-2017» бағдарламасына сәйкестігі туралы сертификатын алуға ұсынылды.
Сонымен қатар, аталған бағдарламаға «Әлем» және «Әлем+» қонақ-үйлері де енгізілгендігін атай кеткен ләзім. Бұдан басқа, жергілікті тұрғындарға ЭКСПО-2017 халықаралық көрмесінің маңызы мен мақсатын жан-жақты көрсету үшін 32 баспасөз құралдары, 4 телеарна мен 1 ақпараттық агенттік тартылғандығын да атап өткен орынды.
Үстіміздегі жылдың 27 сәуірінде Көкшетау қаласында ЭКСПО-2017 халықаралық мамандандырылған көрмесіне еріктілерді даярлаудың үшінші кезеңі аяқталды. Соған орай 100-ге тарта ақмолалық ерікті таңдап алынса, олар шілденің 3-і мен 31 аралығында өз міндеттеріне кірісетін болады. Бұдан басқа, өңір ауылшаруашылық өнімдерімен де қамтамасыз ететіндігі белгілі болып отыр. Атап көрсеткенде, үстіміздегі жылдың 10 маусымы мен 10 қыркүйегі аралығында өтетін халықаралық маңызды шараға жеткізілетін ет және ет өнімдері 4,6 мың тоннаны; сүт және сүт өнімдері – 8,1 мың тонна; жұмыртқа – 63,0 млн дана; жемістер – 0,4 мың тонна және картоп 2,2 мың тонна көлемінде болады деп күтілуде.
Асқар ТҰРАПБАЙҰЛЫ,
«Егемен Қазақстан»
Ақмола облысы
