Мемлекеттік хатшы алдымен қазақ пен поляк ұлттары арасындағы достықтың тамыры тереңде жатқанын атап өтті.
Жалпы, поляктардың ұлтымызға деген құрметі мен ілтипаты ерекше екені белгілі. Ең алғаш еуропалықтарға Ұлы Даламыз туралы сыр шерткен Польша монархы Бенедикт болса, әлем әдебиетінде қазақтар жайлы тұңғыш поэма жазған да поляк перзенті, әйгілі романтик ақын Густав Зелинский болатын. Бертінде халқымыздың мың күйін нотаға түсіріп, рухани қазынамызға өлшеусіз үлес қосқан Александр Затаевич те поляк екенін көзіқарақты қауым жақсы біледі. Міне, екі ел арасында байырғыдан қалыптасқан достық рәуіштегі дәстүр бүгінге дейін жалғасын тауып отыр.
– Біз Польшаны қарқынды дамып келе жатқан мемлекет ретінде жақсы білеміз. Елдеріңізде экономика саласына, соның ішінде орта және шағын кәсіпкерлікті дамытуға қолайлы жағдай жасалғанын былтырғы сапарымызда анық байқадық. Өткен жылы тамыз айында Қазақстан Президенті Нұрсұлтан Назарбаев Польшаға ресми сапармен барғаны мәлім. Сапар барысында екіжақты байланысты нығайтатын көптеген, келіссөздер жүргізіліп келісімдер жасалды. Ал биылғы қыркүйек айында Польша Республикасының Президенті Анджей Дуданың елімізге сапары күтіліп отыр, – деді Гүлшара Әбдіқалықова.
Оның айтуынша, бүгінде Қазақстанда поляк этносының 32 мыңнан астам өкілі тұрады. Екіжақты қарым-қатынастың ауқымы мәдениет пен гуманитарлық салада да кеңейіп келеді. Қазіргі таңда еліміздің 700-ден астам жасы Польшаның университеттері мен колледждерінде білім алып жатыр. «Жақында Астана мен Варшава арасына ұшатын тікелей рейс ашылды. Орталық Азия мен Польшаны біріктіретін рейстің арқасында екі елдің байланысы артып, туризм саласы дамитыны анық», деді Мемлекеттік хатшы.
Сонымен бірге, ол Қазақстан мен Еуропалық одақ арасындағы серіктестік пен ынтымақтастықты кеңейту туралы келісімге Польша Парламенті алғашқылардың бірі болып үн қосып, келісімді ратификациялағанына алғыс білдірді.
Өз кезегінде сөз алған Польша Парламенті Сенаты Төрағасының орынбасары Мария Коц жылы қабылдауға ризашылығын білдірді. Оның айтуынша, тағдыр талайымен Қазақстанға көшіп келген талай этнос өкілі осында бейбіт жағдайда өмір сүріп жатыр. Соның ішінде поляктарға да салт-дәстүрін сақтап, тарихы мен мәдениетін дамытуға мүмкіндік берілген. Бұл Қазақстанның бейбітшілік пен тұрақтылықты сақтай отырып өркендеп келе жатқан ел екенін көрсетеді.
Сондай-ақ, ол қазақ-поляк қарым-қатынастарының қазіргі ахуалы мен саяси-экономикалық ынтымақтастықты нығайту мәселесін қозғады.
Кездесу соңында Мемлекеттік хатшы Гүлшара Әбдіқалықова Польшаны 2018-2019 жылдары БҰҰ Қауіпсіздік Кеңесінің тұрақты емес мүшелігіне сайлануымен құттықтады.
Қымбат ТОҚТАМҰРАТ,
«Егемен Қазақстан»
