Облыс әкімі өзінің құттықтау сөзінде ЭКСПО-2017 халықаралық көрмесінің аясында өтіп жатқан мыңдаған шаралардың бірі Ақмоланың мәдени күндері екенін атап өтті. «Біз өзіміздің сан қырлы бай мәдениетімізді, өлкеміздің бірегей дәстүрін Астана жұртшылығына ұсынып жатқанымызға қуаныштымыз», деді әкім.
Ол сондай-ақ, Ақмола облысы ЭСКПО-ға жиылған қонақтар легін күтетінін мәлімдеді. Өйткені, облыс аумағында еліміздің табиғаты тамаша жерлері – Бурабай мен Қорғалжын қорығы бар. Әсіресе, шетелдік қонақтардың осы бір әсем жерлерді аралайтыны сөзсіз.
Сонымен, Ақмола облысының мәдени күндері 20-25 маусым аралығын қамтиды. Алғашқы шаралар легі өтіп те үлгерді. Мысалы, «Арқаның кербез сұлу Көкшетауы» гала-концерті үлкен аншлагпен өтті.
22-25 маусым аралығында «Қазанат» ипподромында орналасқан «этноауылда» Көкшетау қаласы мен Қорғалжын, Бурабай, Шортанды аудан-
дарының шеберлері табиғи материалдардан жасалған бұйымдарын сатылымға қояды, оған қоса шеберлік сыныптарын өткізеді. Сондай-ақ, осы жерде «Дала сыры» концерті өтеді.
Жалпы, Ақмола облысының мәдени күндері аясында көпшілікке «этноауылдың» амфитеатрында облыстық орыс драма театры «Шыңғыс хан» рок-операсын, Ш.Құсайынов атындағы қазақ музыкалық-драма театры «Көкше әуендері» концерттік бағдарламасын ұсынады. Аталмыш театрлар елордадағы «Жастар» сарайында да бірқатар драмалық туындыларын сахнаға шығармақ.
Айгүл СЕЙІЛОВА,
«Егемен Қазақстан»
