Рәсімге жиналған жұртқа қошемет білдірген Дүниежүзі қазақтарының қауымдастығы Төрағасының бірінші орынбасары Талғат Мамашев мырза, алыстан ат терлетіп келген қонақтарға ыстық ықыласын білдіре отырып, атаулы шара құрылтайға қош келуімен құттықтады.
Одан кейін арнайы әзірленген көлікке отырған қонақтар қала шетінде орналасқан «Этноауылға» ат басын бұрды. Бұнда Ақмола облысының мәдени күндері өтіп жатыр екен. Күмбірлеген күйдің үнімен һәм шырқап салған әннің сәнін келтіріп қадірлі меймандарды қарсы алған облыс өнерпаздары көпшілікке қазақтың салт-дәстүрлік рәсімі «Құда түсу», «қыз ұзату», «Келін түсіру», «Бет ашу» сияқты жоралғыларды көрсетті.
«Этноауылдың» сәні ақшаңқан боз үйлердің әрбіріне бас сұққан ағайындар ұлттық қолданбалы өнер түрлерін тамашалап, ақ күмісті қақтай зерлеген алқа-сырға, көн былғарыдан оймыштап жасаған саба-торсық, тірі жүнді пісіріп өрмекшелеп ою салған кілемшелерді жағалай көріп шықты. Үйде қалған туыс-жұрағатқа тәбәрік болсын деп үзіп-жұлып алып жатқандар баршылық.
Мына бір шетте түлекте отырған қоңыр бүркітін көтеріп құсбегілер саятшылықтың сәнін көрсетсе, ортадағы кілемде жас балуандар белсенді белдесудің өрен үлгісін көрсетті.
Осылай атам қазақтың байырғы көшпенді өмірінің өнегесін көрген шетелдік қазақтар бірі басын шайқап, таңдайын қақса, екіншілері, мұндай ел берген, оның ертеңі нұрлы, болашағы баянды боларына сенген риза кейіппен батыстан желпи соққан самал желдің өтіне кеудесін керіп, алшаң басып бара жатты...
Осы алқалы жиынның бел ортасынан қазақжанды апамыз Асылы Османды жолықтырып: − Бүгінгі мерейлі мереке жайлы не айтасыз? – деп едік, апамыз көсіліп қоя берді:
– Дүниежүзі қазақтары құрылтайының мәні де, жөні де басқа. Өйткені, адам баласы үшін сағыныш та бір бақыт. Сол сағынышын құс қанатына арқалап еліне жеткен қандастарымыз ұядай елінде ұрпақ өсіріп отырған сіз бен бізді көріп, көңілі марқайып, сенімі нығаймай ма?! Алла қазақты осы бақытынан айырмаса екен. Қазаққа дарқандық даласынан дарыған, сөйтіп бұл халық тектілікке жарыған. Мына айналаңда самаладай самсап, шамшырақтай шалқып тұрған боз үйлерге қарамайсыз ба, қандай көркем үйлесім. Ақыл-есі сау адам қуанышқа қуана білуі керек қой. Осыны сырттан келіп көрген қазақ өзінің қазақ болып туғанына қуанбай ма?! Алла елімді даласымен, халқымды Назарбаев сияқты данасымен, сәбиді анасымен, азаматтарды ойлы санасымен сақтағай, – деп ақжарма сөзін қайырды.
Күн еңкейгенде «Этноауылдан» қайтқан қонақтар кешке «Астана опера» театрына барып «Қыз Жібек» қойылымын тамашалады. Ұлы тойдың жалғасы, яғни құрылтайдың ашылу салтанаты бүгін өтіп, сенбі күні жоспарлы іс-шаралар жалғасын табады.
Бекен Қайратұлы,
Ұларбек Нұрғалым,
Суретті түсірген Орынбай Балмұрат
«Егемен Қазақстан»
