Тарих ғылымдарының докторы, Л.Н.Гумилев атындағы ЕҰУ археология және этнология кафедрасының профессоры Айман Досымбаеваның айтуынша, Ақмола облысы аумағындағы қасиетті орындардың біртұтас желісін құру өңір тарихын толықтай түсінуге мүмкіндік туғызып, туристік кластердің дамуына өзіндік серпін беретін болады. «Қазір бізге қасиетті ескерткіштердің біртұтас желісін құру жұмыстарын қандай оңтайлы жолмен бастауды зерттеп алуымыз қажет. Облыстың тарихи-мәдени құндылықтарын, өңірдің ғана емес, бүкіл Қазақстанның қасиетті орындарын жастайынан білуге баулу үшін мектепке дейінгі және мектептегі білімге ерекше көңіл бөлінуі қажет», деді Сәуле Бұрбаева өз сөзінде.
Реті келгенде қазір Ақмола облысы аумағында 1793 тарихи-мәдени нысан бар екендігін айта кетейік. Археологиялық жәдігерлер санатындағы 1375 ескерткіш Зеренді, Ерейментау, Бурабай, Қорғалжын және Атбасар аудандарының аумағында орналасқан. Мәдениет басқармасы басшысының айтуынша, қасиетті ескерткіштер картографияланып, ғылыми жүйеге түсірілгенімен, оларды терең зерттеп, жалпыұлттық тарихи-мәдени құндылықтар нысандарының тізімін жасау орынды болмақ. Осыған орай Мәдениет басқармасы жанынан құрамында ведомство қызметкерлерінен өзге мұражай қызметкерлері, өлкетанушылар, ғалымдар мен тарихшылар бар жұмыс тобы жергілікті және республикалық маңызы бар нысандарды Рухани нысандар картасына енгізу бойынша жұмыс жүргізуде.
Асқар ТҰРАПБАЙҰЛЫ,
«Егемен Қазақстан»
Ақмола облысы
