Алғашқы шара – ЭКСПО қалашығындағы Италия Республикасының павильонында өтті. «Эни СпА» компаниясының серіктесі «АджипҚарашығанақ Б.В» компаниясы мен «ҚазМұнайГаз» Барлау Өндіру» акционерлік қоғамы арасында әріптестік меморандумдары түзіліп, «ҚазМұнайГаз» БӨ» АҚ бас директоры Құрманғазы Есқазиев пен «Эни СпА»-ның барлау және өндіру бойынша бас директоры Антонио Велла құжаттарға қол қойды.
Аталмыш құжатта тараптар көмірсутегін барлау және өндіру бойынша әріптестікті дамытуға келісті. Негізінен тараптар көмірсутегіні геологиялық барлау мен өндірудегі, оған қоса ноу-хау және ең жақсы тәжірибелермен алмасу бойынша технологиялық әріптестіктің мүмкін болған бастамаларын анықтауға тырысатынын жеткізді. Бұл мақсатта екі тарап талдау нәтижелерін үйретуге, сондай-ақ, геологиялық және өндірістік үдерістерді зерттеуге бағытталған консультациялар өткізуге ниетті.
Сондай-ақ, құжаттың маңызды бір бөлігі ҚМГ БӨ компаниясының қызметкерлер тобы үшін тренинг бағдарламаларын жүзеге асыру болып табылады. Мұны «Эни СпА»-ның барлау және өндіру бойынша алдыңғы қатарлы тәжірибесін үйрету үшін «Эни СпА»-ның өзі қолға алады.
Бұл туралы «ҚазМұнайГаз» Барлау Өндіру» АҚ басшысы Қ.Есқазиев түсінікті етіп айтып берді. «Осы айдың бас жағында Милан қаласына барып келдім. Онда мені Антонио Велла мырза күтіп алды. Оның алдында жасалған келісімшартқа сәйкес, «Эни СпА» компаниясы «Өзенмұнайгаздың» инженерлер тобын оқытқан еді. Олар жарты жыл бойы геология және геофизика, өндіру және бұрғылау, мұнай кен орындарын жобалау, техника қауіпсіздігі салалалары бойынша компанияның корпоративті университетінде білім алды. Міне, 5 маусымда мен біздің 12 мұнайшының арнайы жасалған оқыту бағдарламасын аяқтап, сертификат алуына қатыстым. Енді олар «Эни СпА» компаниясының өндірістік нысандарында тәжірибеден өтуде», деген ол меморандумның маңызды бір бөлігі қызметкерлерге арналған тренингті бағдарламаларды жалғастыруға арналғанын мәлімдеді. Яғни, аталған 12 мұнайшыдан өзге тағы да топтар жасақталып, Миланға жіберілмек. Бірақ бұл жолы оқу қаражатын қазақстандық мұнай-газ компаниясы шығаратын болады.
«ҚазМұнайГаз» Барлау Өндіру» акционерлік қоғамының басшысы қол қойған екінші бір құжат – үшжақты келісім туралы Меморандум. Бұл шара ЭКСПО қалашығындағы «Шелл» концернінің павильонында өтті. Әріптестік туралы Меморандумға «ҚМГ» БӨ» Ақ бас директоры Құрманғазы Есқазиев, Қазақстандағы «Шелл» концернінің төрағасы және Апстрим вице-президенті Данкан ван Берген, сондай-ақ, «ҚазМұнайГаз» өндіру және бұрғылау технологиялары ғылыми-зерттеу институты бас директорының міндетін атқарушы Дэвид Джон Сзабо қол қойды.
Меморандум аясында ҚМГ БӨ мен «Шелл» компаниясы мұнай-газ саласы бойынша бірлескен түрлі жобаларда әріптестікті дамыту мен нығайтуға ниетті. Екі тарап та ҚМГ БӨ компаниялар тобы алдында тұрған стратегиялық тапсырмалар бойынша мұнай-газ саласындағы бірқатар бастамаларды зерттеуге және мүмкіндігінше жүзеге асыруға мүдделі. Ал үшінші тарап, яғни аталмыш ғылыми-зерттеу институты бастамаларды жүзеге асыру мүмкіндігін талқылау барысында консультациялық қолдау көрсетеді.
«ҚМГ»БӨ» АҚ пен «Шелл» компаниясы мұнай алу әдістерін арттыруды жүзеге асыру мүмкіндігін, отандық компания таңдаған кен орындарының өндірістік тиімділігін бірлесіп зерттеуге ниетті. Бұл қазақстандық компанияның бірқатар жобасын техникалық-экономикалық бағалау жүргізуді қолдауға да қатысты.
Меморандум аясында тәжірибе алмасу бойынша іс-шаралар, ҚМГ БӨ қызметкерлеріне оқыту курстары мен мүмкін болған тағылымдамалар ұйымдастыру қарастырылған.
Құжатқа қол қою рәсімі аяқталған соң тараптар атынан компаниялардың басшылары лебіздерін білдірді. Қ.Есқазиев өз сөзінде меморандум аясындағы пункттермен таныстырса, «Шелл» концернінің төрағасы және Апстрим вице-президенті Данкан ван Берген Меморандум арқылы Қазақстанның мұнай-газ саласына үлес қоса алатындықтарын жеткізді. «Біз қолдау көрсетуге, өз тәжірибемізбен бөлісуге да-
йынбыз», деді ол.
Қалмаханбет МҰҚАМЕТҚАЛИ,
«Егемен Қазақстан»
