Рашид Байпақбаевты 1982 жылы Семейде оқып жүргенде көлік қағып, екі күн ес-түссіз жатып, бес рет ота жасалыпты. «Клиникалық өлімді басымнан кешіргесін денсаулығымды қалпына келтіру қажет болды. Сол мақсатта велосипед тебе бастадым», дейді ол.
Облыс аумағындағы аудандарға шайтанарбамен желдей жүйткіп барып-келіп жүретін жігіт ағасы еліміздің өзге өңірлеріне де екі аяқты көлігімен саяхаттайтын көрінеді. 2011 жылы мың шақырымнан асатын Астанаға 9, 2012 жылы Алматы арқылы Түркістан қаласына 20 күнде жетіпті. Осы уақытқа дейінгі бағындырған межесі – 120 000 шақырым. Күніне орташа есеппен 100-120 шақырымды артқа тастайды екен.
«Велосипед тебу адамның қан қысымын қалпына келтіріп, артық салмақтан арылтады. Жүрек қан-тамыр жүйесін, зат алмасу, тыныс алу қызметін жақсартады. Ұйқысыздық дертіне де таптырмас ем», деген ауыл тұрғыны алдағы уақытта Атырау мен Ақтауға баруды жоспарлап жүргенін айтты.
Азамат ҚАСЫМ,
«Егемен Қазақстан»
Шығыс Қазақстан облысы,
Көкпекті ауданы
