«Сербия – халықаралық аренадағы Қазақстанның сенімді досы. Біз осы достықты бағалай отырып, екі елдің ынтымақтастығын нығайтуға күш саламыз. Сербияның ұлттық күні мәдени қарым-қатынастарымызды күшейтеді деп сенемін», деді жиында Ұлттық экономика вице-министрі Ернар Бакенов.
Сербия елшісі Владимир Матич өздерінің павильоны болашақтың энергиясына үңілуге мүмкіндік беретінін жеткізді. Ұлттық павильон төрт табиғи элемент арқылы қуат көздерінің соны жетістіктерін паш етеді. «Болашақтың энергиясы» – ЭКСПО-2017 көрмесінің тақырыбы – расында, бүгінгі әлем үшін өте өзекті. Бұл шара энергетика саласындағы инновациялық технологияның орталығына айналатынына сенемін. Сербия павильоны көпшілікке дәстүрлі элементтер – су, ауа, жер және от мүмкіндіктерімен жарқын болашақ жасалатынына көз жеткізеді», деді Владимир Матич.
Бағдарламаның екінші бөлімінде Сербия туралы фильм көрсетілді. Сондай-ақ, сол елдің табиғи көркін паш еткен туындының тұсауы кесіліп, Сербияның туристік ұйымдарының өкілдері сөз сөйледі. Жиынға қатысушылар 2008 жылы «Евровидение» байқауында елінің намысын қорғап, «Oro» әнімен алтыншы орын иеленген Елена Томашевич пен виолончельде ойнаған Елена Михайловичтің өнерін тамашалады. Сонымен қатар, «Иво Лола Рибар» академиялық мәдени-шығармашылық бірлестік ұлттық билерін орындады.
Асхат Райқұл,
«Егемен Қазақстан»
