Бәсеке белесі

Кеше 1/8 финалда түске дейін екі боксшымыз қолғап түйістірді. Біреуі – 64 кило сал­мақта Данияр Елеусінов, екіншісі – 81 килода Әділбек Ния­зымбетов, үшіншісі – 75 кило­дағы Данабек Сужанов. Осы боксшыларымыздың ішінен соң­ғы екеуі Олимпиадаға жолдама алды. Ал біздің бірінші кездесуіміз өкінішке қарай, сәт­сіз өтті. Данияр Елеусінов мажар бокс­шысы Гьюла Кэйттен жеңіліп қалды. Кездесуде мажар 17:11 есебімен же­ңіс­ке жетті. Да­ниярдың қарсы­ласы 2009 жылғы әлем чемпио­на­ты­ның қола жүл­де­гері. Бұған дейін оның 2009 жылы Миланда Рустам Сыбайды, былтыр Анталияда өткен халықаралық жарыс­та Әділбек Елгезековты ұт­қан еді. Енді, міне мажар әлем чем­пионатына алғаш рет қатысқан бокс­шымыздан айла­сын асырып кетті. Бұл боксшының бәсекеде кем дегенде тағы да қо­ла медальді же­ңіп алу­ға мүм­кін­дігі бар. Ал Данияр бол­са, жекпе-жегіне тағы да қызуы көтеріліп шыққа­нын айтты. Кездесуден кейін: «Мен қолдан кел­геннің бәрін жаса­дым. Мүмкін ден­сау­лығым да же­ңу­ге мүмкіндік бер­меген шығар», – деді ол. Қалай дегенде де мажар боксшысының жақсы кездесу өткізгенін мойындау керек. Мұны біздің бас бапкер Айтжанов та мойындап отыр. «Кездесуде жеңілгені көрініп тұрды ғой. Енді келесі жылы сәуірде Астанада өтетін лицензиялық жарысқа дайындалу керек. Данияр сол жерде жолдама алады. Ол Лондонға бару керек», деген пікірін айтты. Кеше Елеусіновтің кездесуінен кейін 81 килода Әділбек Ниязымбетов ұлттық құрамаға әлем чемпионатындағы алғаш­қы лицензияны сыйға тартты. Колумбиялық Джейсон Монроймен кездесуде Әділбек екінші раундтың 2 минөті 20 се­көнтінде қарсыласын оң қолмен нокаутқа жіберді. Осы кезде колумбиялық рингте бір минөт­тей жатып, орнынан тұра алма­ды. Бәріміздің жанарымыз шар­шы алаңда. Ниязымбетов қар­сы­ласын нокаутқа ұрып, құла­тып­ты. Төрешілер әділ ба­ға­сын берді. Нокаут есептелді. Бакудегі бокс кешінде 75 кило салмақтағы кездесуде біздің құрамаға Данабек Сужанов жолдама алып берді. Ол АҚШ өкілі Джесси Хартты жеңді.Бұл кездесуде оған алдыңғы екі жекпе-жек сияқты оңай болмағанын айту керек. Дегенмен екінші раундтан кейін есеп 9:9 болғанд боксшымыз намысқа тырысып, жеңіске жетті. Есеп – 17:15. Енді ол ширек финалда бразилия­лық Эскьюва Фалькаомен кездеседі. Әлем чемпионатына Елеусінов, Ниязымбетов сияқты алғаш рет қатысып жатқан боксшымызға сәттілік тілейміз. Одан кейін басқа салмақтарда Серік Сәпиев (69 кило), Ғани Жайлауов (60 кило), Василий Левит (91 кило) пен аса ауыр салмақтағы Иван Дычко қолғап түйістірді. Олардың кездесулері кешкі бағдарламада өткендіктен бұл репортажға кіргізуге үлгере алмадық. Дастан КЕНЖАЛИН – Бакуден.