Жыл сайынғы дәстүрге айналған шара биыл үшінші мәрте ұйымдастырылды. Оған «ҚазМұнайГаз» ҰК» АҚ Директорлар кеңесінің төрағасы Фрэнк Куйлаарс, «ҚазМұнайГаз» ҰК» АҚ Басқарма төрағасы Сауат Мыңбаев, «ҚазМұнайГаз» ҰК» АҚ Директорлар кеңесінің мүшелері мен ҚМГ тобына кіретін компаниялардың бірінші басшылары қатысты. Форумда «ҚазМұнайГаз» ҰК» АҚ-ның компаниялар тобындағы қауіпсіздік мәдениетін бағалау және жетілдіру мәселелері талқыланды.
Форумның ашылу салтанатында Директорлар кеңесінің төрағасы Фрэнк Куйлаарс қатысушыларды құттықтап сөз сөйледі. Ол алға жылжудың ең тиімді тәсілі көшбасшыларды, компаниялар тобы қызметкерлерінің командасын, кәсіподақтарды біріктіру екенін және жарақаттану деңгейі «нөл» болатын ең қауіпсіз компания мәртебесіне ұмтылу маңызды мақсат екенін атап өтті.
«Компанияның ІРО-ға шығуға дайындалуына байланысты бұл жұмыс ерекше мәнге ие болып отыр. Компаниялар акциясы батыстық инвесторлармен тек қаржылық көрсеткіштермен ғана емес, сондай-ақ FAR және LTIR көрсеткіштері бойынша бағаланады», деді Ф.Куйлаарс. Мұндағы FAR дегені – өліммен аяқталатын оқиғалар коэффициенті болса, LTIR жарақаттану коэффициентін білдіреді.
Ал өз кезегінде Басқарма төрағасы Сауат Мыңбаев ҚМГ еншілес және тәуелді компанияларының басшыларының жеке жауапкершілігіне ерекше назар аударды. Компания саясатына сәйкес кәсіпорындарды басқару үдерісі қауіпсіздік мәселелеріне басымдық беруі тиістігін тілге тиек етті. Өндірістік персоналды қауіпсіз жұмыс істеудің дағдыларына үйрету керектігін, қауіпсіздік нормаларының бұзылуы оқиғаларының алдын алу және болдырмау үшін ол оқиғаларға талдау жасау қажеттігін атап өтті. Сондай-ақ, ол соңғы екі жылда барлық қызметкерлердің ұмтылысымен жазатайым оқиғалар бойынша есеп беру кезінде жүйелі себептерді анықтау және тиісті шараларды қабылдау бойынша жақсы нәтижелерге қол жеткізілгенін айтты.
«Біз дұрыс бағытта келе жатырмыз. Еңбекті қорғау және қауіпсіздік саласында айтарлықтай өзгерістерге қол жеткізілді», деді «ҚазМұнайГаз» ҰК» АҚ басшысы. Сондай-ақ, ол қауіпсіздік мәдениетін қалыптастыруда басшының рөлі маңызды екенін атап өтті.
Форум барысында әдеттегідей өз саласының білгір мамандары – «ҚазМұнайГаз» ҰК» АҚ Еңбек және қоршаған ортаны қорғау жөніндегі вице-президенті Винсент Спинелли, Еңбек және қоршаған ортаны қорғау бойынша қызмет көрсету бағытындағы басшысы Сергей Дайман, «Zerecon» ЖШС атқарушы директоры Сергей Ли, Еңбек және қоршаған ортаны қорғау департаменті сарапшысы Антон Давиденко қауіпсіздіктің түрлі бағыттары туралы баяндап, ақпараттармен бөлісті.
Форумға қатысушылар жетістіктер жөнінде айта келіп, кейбір кемшіліктер туралы да сөз қозғады. Кейбір күрмеуі қиын мәселелерді де талқылады. Жарақаттану жағдайларына да мысалдар бар. Келеңсіз жағдайлардың көпшілігі қауіпсіздік ережелерін сақтамағаннан болады. Ал ережені бұзудың басым бөлігі ережені білмегендіктен емес, оған «еті үйреніп», мән бермеуден, қауіпсіздік шараларына немқұрайлы қараудан туындайды екен. Сол себепті басшылар еңбек қауіпсіздігі мәселесіне ерекше мән беруі тиіс. Әрине, қызметкерлердің қауіпсіздігін қамтамасыз ету және өндірісте жарақат алу деңгейін азайту – әрбір басшының бірінші кезектегі міндеті. Дегенмен, қауіпсіздік – басшыдан бастап, қатардағы қызметкердің құқығы мен саналы таңдауы. Әрбір қызметкер бұл жағдайға зор жауапкершілікпен қарағаны абзал.
Мұнай-газ саласында қауіпті жағдайлар аз емес. Бастысы, жарылу қаупі бар материалдармен жұмыс жасағанда ұжым мен тұтынушылардың өмірі және қауіпсіздігі үшін жауапкершілікті ұмытпаған жөн. Өткен жылы компания «ҚазМұнайГаз» қауіпсіздігінің алтын қағидаларын» енгізді. Онда жабық кеңістікте, биіктікте және басқа да қиын талаптарда жұмысқа дайындық, энергия көздерімен жұмыс жасау кезінде әрекет тәртібі сияқты өндірістік қызметтің барлық негізгі аспектілері қамтылған. Бірнеше ай бойы компания қызметкерлері кеңесшілермен бірлесе отырып, нормативтерді, ережелер мен рәсімдерді, яғни төтенше жағдай әрекеттерінің барлық қажетті тәртібін талдап шыққан.
Өндірістегі қауіпсіздік мәселелеріне басшылар тарапынан немқұрайлылық болған жерде проблемалар пайда болады. Өндіріс «командирлері» бұл мәселе бойынша өздері жеке үлгі көрсетуі тиіс, өндірістік нысандарға жиі барып тұру керек, жүйелі негізде кемшіліктерді анықтау қажет, оларды реттеу бойынша бағдарламалар енгізу керектігін мамандар осы жиында баса айтты.
Форум соңында өткен жылдың қорытындысы бойынша еңбекті қорғау саласында үздік нәтижелері үшін «ҚазМұнайГаз» еншілес және тәуелді компаниялары Құрмет грамоталарымен марапатталды. Жеңімпаздар қауіпсіздік және еңбекті қорғау, қызметкерлер саны, еңбекті қорғау қызметкерлерінің компания қызметкерлерінің жалпы санына қатысы сияқты көрсеткіштерді бағалаумен анықталған. Корпоративтік стандарттар мен бастамалар енгізу, еңбек қорғау саласында тәуекелдерді басқару бойынша жұмыс, сондай-ақ алдыңғы қатарлы тәжірибені қолдану сияқты талаптар ескерілген. Құрмет грамоталарын «ҚазМұнайГаз» ҰК» АҚ Басқарма төрағасы Сауат Мыңбаев тапсырды. Марапатталғандар қатарында «Мұнайтелеком» ЖШС, «Ойл Транспорт Корпорейшэн» ЖШС, «ЕмбіМұнайГаз» АҚ, «Павлодар мұнай-химия өңдеу зауыты» АҚ, «Интергаз Орталық Азия» АҚ компаниялары бар.
Динара БІТІКОВА,
«Егемен Қазақстан»
