«Егеменге» ел етене

Жылдың қоңыр күзі бұ­қаралық ақпарат құралда­ры үшін әрдайым аса бір ма­ңызды шақ. Екі айдан астам уақытқа жалғасатын бас­па­сөзге жазылу науқаны қы­за­ды. Талап-тал­ға­мы биік оқыр­­ман қауымның қай ба­сы­лымды көңілі қалай­тын­дығы, сүйіп оқитындығы анық бай­қа­ла­тын сын. Бұл ретте тәуел­сіздігіміз бен рухани азатты­ғы­мызды мемлекеттік мақсат-мүддемен тұ­тас­ты­рып, өр­ке­ниеттік өріне ұм­тыл­дырып келе жатқан елі­міздің бас газеті «Егемен Қа­зақстанның» ор­ны бөлек екен­дігі белгілі. Соң­ғы он бір жыл ішінде оқырман қа­тарының 38 мыңнан 170 мың­ға дейін жетуі соның нақты ай­ғағы деуге болса, солардың қа­лың бір бөлігі қараған­ды­лық­тар. ХХІ ғасыр басындағы 3 мыңнан қазір 12 мың 500-ге өсіп, жергілікті жұртшылықты баурай түсіп келеді. Жылдағы қалыптасқан үр­діске орай «Егемен Қазақ­стан» республикалық газеті» АҚ президенті Сауытбек Абдрахманов өңірлердегі кездесуді кеше Қараған­дыдан бас­тады. Басылым бас­шысы ал­дымен облыс әкімі Серік Ах­метовтің қабыл­дау­ын­да бол­ды. Әңгіме барысында ай­мақтың әлеуметтік-эконо­ми­калық жағдайы мейманға жан-жақты таныстырылды. Серік Нығметұлы атап өт­кендей, өн­ді­рісті өңір дамуы­ның жаңа кезеңінде Елбасы алға қойған міндеттер мен тапсырмаларға сәйкес жүзеге асырылып жат­қан іс-шаралар ауқымы кең. Соның ішінде индустриялық-инновациялық даму бағдар­ламасы аясында белгіленген жо­балардың 9-ы бірінші жар­ты­жылдықта іске қосылды. Жыл аяғына дейін тағы 15-і өн­діріске жолдама алмақшы. Мұның өзі 2000-ға тарта жұ­мыс орнын құруға мүмкіндік береді. Сондай-ақ әлеуметтік саладағы өркенді өзгерістер мен мәдени өмір­дегі жаңару­лар да назардан тыс қалған жоқ. Серік Ахметов сөз орай­ын­да облыста «Егемен Қазақ­стан» газетінің оқырмандары жылдан-жылға ұлғайып келе жатқандығын айтып, алдағы жылы 13 мыңға толыға түсе­тін­дігіне сенім білдірді. «Еліміз бас басылымының елдік ор­тақ мақсат-мұратқа ұйыс­ты­ру­дағы салиқалы үні, пара­сат­ты пайымы жұрт жүрегіне ұя­ла­ған. Оқырмандар «Егеменді» сырлас, ақылшы тұ­тып, өз­де­рінің бағыт-бағдары санайды. Ол қарағанды­лық­тар­ға да етене жақын. Сон­дық­тан аға газеттің таралымы ұлғаюын қа­лаймыз», – деді өңір бас­шы­сы. Сауытбек Абдрахманов ай­­мақтың тыныс-тіршілігі ту­ра­лы кеңінен баяндалған әңгі­ме­ге ри­зашылық білдірді. Өз та­рапынан басылым мәр­те­бесін көтере түсу, оқыр­ман қауым­ның биік тал­ғамынан көріну бағы­тындағы редакция ұжы­мы­ның шы­ғар­ма­шылық ізденісін баян етті. Облыс әкімімен әң­гі­меден соң газет бас­шы­сы жергілікті ақпарат құ­рал­дарына сұхбат бер­ді. Онда мұндай кез­де­су­лердің өңірлердегі жағдай ту­ра­лы кеңінен мәлімет алуға, со­нымен бірге бас­пасөзге жа­зылу барысын тал­қы­лау­ға әсе­­рі зор екені айтылды. Сауытбек Абдрахманов­тың аймаққа жұмыс сапары об­лыстық «Орталық Қазақ­стан» газетінің 80 жылдық мерейтойымен тұс­па-тұс келді. Осы айтулы оқи­ғаға бай­ланысты өңір басшысы мен мейман Сәкен Сейфуллин атындағы облыстық қазақ драма театры ғимаратында өт­кен салтанатты жиынға келіп қа­тыс­ты. Мерейтойда об­лыс әкі­мі редакция журналистерін мерейлі мерекелерімен құттық­тап, қаламгер­лер­дің бір тобына ақшалай сый­лықтар табыс етті, ұжымға темір тұлпардың кілтін тап­сырды.  «Егемен Қазақстан» газетінің басшысы өз кезегіндегі құттықтау сөзде өңір өмірі айнасының еліміздегі беделді, даңқты дәстүрлері бар басылым тұрғысында та­ны­лып отырғандығын айтып, жергілікті әріптестер еңбе­гіне шығармашылық табыс тіледі. Басылымды он бес жыл­дан бері жемісті басқа­рып келе жатқан  Мағауия Сем­байға «Қазақстанның құр­­мет­ті журналисі» атағы­ның төс­белгісі тағылды. Жиында журналистер ең­бегі жөнінде жақсы лебіздер көп айтылды. Солардың ішіндегі нәрлі сөздің бірі – газет ардагері Нұрмахан Ораз­бе­ковтің: «Журналист – ең жауапты мамандық. Өйткені, журналист қоғам үшін жауап береді», деген сөзі. Расында да солай. Айқын НЕСІПБАЙ, Қарағанды.