06 Қазан, 2011

Қадағалаушы органның міндеттері де ортақ

201 рет көрсетілді
Халықаралық беделді ұйымдардың фо­румдарын өткізу қай елдің де абыройын арттырары сөзсіз. Өз тәуелсіздігінің 20 жыл­ды­ғының табалдырығында тұрған Қазақ­стан бұл мәселеде біраз тәжірибе жинақтап та үлгерді. Осындай үлкен жиын – Про­ку­рор­лардың халықаралық қауымдас­ты­ғы­ның 6-шы өңірлік конференциясы кеше Астанада өз жұмысын бастады. «Қылмыстық-құқықтық саладан тыс заңдылықты қам­тамасыз етудегі прокуратураның орны» атты тақырыпты көтерген форум жұмы­сы­на әлемнің 45 елінің бас прокура­ту­ра­лары­ның делегациялары, сондай-ақ БҰҰ, ЕҚЫҰ, Еуроюст және басқа да беделді халықаралық ұйымдар өкілдері қатысуда. Қазақстан Республикасының Президенті Н.Назарбаевтың кон­ференцияға қатысушыларға құт­тықтауын Парламент Сенаты­ның Төр­ағасы Қайрат Мәми оқып бер­ді. Сондай-ақ конфе­рен­ция­ны кіріспе сөзбен ашқан Қа­зақ­стан Республикасының Бас Про­куроры Асхат Дауыл­баев ай­мақ­тық конференцияға қатысушы­лар­ға Қазақстан Рес­пуб­ликасы Пар­ламенті Мә­жі­лісінің Төр­аға­сы, «Нұр Отан» ХДП-ның Мә­жі­лістегі фрак­ция­сы­ның жетекшісі Орал Мұха­мед­жановтың құт­тықтау жібергенін айтып өтті. Прокурорлар қауымдастығы­ның форумы ауқымды деңгейде Қазақстанда алғаш рет өткізіліп отыр. Қатысушылардың ортақ пікірі бойынша, осындай кез­де­сулердің маңыздылығы мен қа­жет­тілігі жаһандану заманы­н­да­ғы ұлттық мүдде шеңберімен шек­теліп қалмайтын өңірлік қауіпсіздікті қамтамасыз ету жө­ніндегі жалпы стратегиялық мін­­деттермен шартталған. Бұл жақындасу үрдісін, ұлттық заң­на­ма мен құқықтық жүйенің үй­лесімділігін, жалпыға ортақ ха­лықаралық принциптер мен стан­дарттарды бағдарға алуды та­лап ететін заман шындығымен үндеседі. Республиканың Бас Проку­ро­ры Асхат Дауылбаев өз сөзін­де Қазақстанның әлемдік қау­ым­дастыққа ықпалдасуы жағ­дай­ында халықаралық ұйым­дар­мен   бірлесе жұмыс істеуі, сөзсіз, маңызды біріктіруші фактор болып табылатынын атап өтті. Сондықтан осындай форумдар өткізудің маңыздылығы, ең алдымен, қазіргі замандағы қауіп-қатерге қарсы іс-әрекетті үйлестірумен және жаңа мүм­кін­діктерге жол ашумен бай­ла­нысты болып отыр. Конференцияның басты та­қы­рыбы – қылмыстық-құқық­тық саладан тыс заңдылықты қамтамасыз етудегі прокурор­дың орны ең алдымен, қоғам­дық-саяси құрылымына қара­мас­тан, әр елдегі маңызды адам құқығы мен қоғам мүддесін қор­ғау қажеттігімен айқын­далады. Осы конференция шеңберін­де азаматтардың әлеуметтік-эко­номикалық құқықтарын, кәсіп­кер­лікті, балалар құқығын қор­ғаудағы прокуратураның атқа­ратын орны сияқты өзекті мәсе­ле­лерді талқыға салу жоспар­ланып отыр. Сонымен қатар, көп­шілік мүддесіндегі қоғам­дық қауіпсіздік, дін бостандығы, ұлтаралық келісім, адам саудасы құрбандарының құқықтарын қор­ғаудағы қадағалаушы орган­дар­дың қызметі талқыланды. Сондай-ақ ақпарат алудың құ­қықтық аспектілері, ақпараттық кеңістікті және құпия ақпарат пен жеке деректерге қылмыстық мақсатта қол сұғудан қорғау мәселелері де талқыланды. Әлемдегі  тұрақтылық пен өр­кендеуді сақтау жолында ха­лықаралық және өңірлік қауіп­сіздік саласындағы өзара тиімді ынтымақтастықты одан әрі ке­ңей­ту үшін қатысушылардың ұжымдық күш-жігерін жұмсауға дайындықтарын растайтын қо­ры­тынды құжатқа қол қойылды. Прокурорлардың халықара­лық қауымдастығы әлемнің 140 елінің прокурорларын біріктіреді. Бұл ұйымға Қазақстан 1995 жылы мүше болып қабылданды. Қауымдастықтың құрамына түр­лі мемлекеттердің прокурорлық қызметтері мен ұйымдары кіреді. Осыған қарамастан қауым­дастық прокуратура түрлері мен қызметін бірегейлендіруді көз­де­мейді. Прокуратура түр­ле­рі­нің тарихи және өзге де айыр­ма­шылықтарына, олардың өкі­лет­тіліктерінің сипатына құрмет­пен қарайды. Прокурорлардың халықара­лық қауымдастығына мүше ел­дердің алдында прокуратураның құқық қорғау әлеуетін дамыту және нығайту міндеті тұр.  Қау­ым­дастық заңның үстемдігі, адам құқығын құрметтеу, құ­қық­тық реформаларды жүзеге асыру, транс­ұлттық қылмысқа қар­сы күресте халықаралық ын­ты­мақ­тастықты арттыру идея­ла­рын бел­сенді түрде насихаттайды. Шарафаддин ӘМІР.  

Лебіздер

  Шейх Мохаммад бин Фахд АЛЬ-АБДУЛЛАХ, Сауд Арабиясының Бас прокуроры, Тергеу бюросы және прокуратура төрағасы: – Қазақстанның «Қылмыстық-құқықтық саладан тыс заңдылықты қамтамасыз етудегі прокуратураның орны» атты тақырыпта өтіп жатқан Прокурорлардың халықаралық қауымдастығының 6-шы өңірлік конференциясына өте тыңғылықты дайындалғаны кө­рініп тұр. Менің ойымша, бүгінгі форумда қоз­ға­лып отырған кез келген тақырып өз маңыз­ды­лығы­мен ерекшеленеді. Конференция шеңберінде аза­маттардың әлеуметтік-экономикалық құқықтарын, кәсіпкерлікте, балалардың құқығын қорғаудағы прокуратураның атқаратын орны сияқты өзекті мәселелер талқыға салынды. Хасен ЭРБИЛЬ, Түрік Республикасы Жоғарғы сотының Бас прокуроры: – Осыдан 20 жыл бұрын Қазақ­стан өзінің тәуелсіздігін жария­ла­ған­да ең алдымен Түрік Республикасы Қазақ елінің тәуелсіздігін таныған болатын. Астанада өтіп жатқан Про­курорлардың халықаралық қауымдастығының бүгінгі конференциясы Қазақстан Тәуелсіздігінің 20 жылдығы қарсаңында өтіп жатқандығының өзіндік ерекшелігі бар. Осы орайда мен Қазақстанның Тұңғыш Президенті Нұрсұлтан Назарбаевты және бүкіл қазақ халқын алда келе жатқан Тәуелсіздіктің 20 жылдығы мерекесімен құттықтағым келеді. 90 жылдық тарихы бар Түрік елі прокуратурасы мен Қазақстан прокуратурасының арасындағы қарым-қатынас нығая береді деп сенемін. Джеймс ГАМИЛЬТОН, Халықаралық прокурорлар қауымдастығының президенті – Ирландияның Бас прокуроры: – Ең алдымен, Халықаралық прокурорлар қауымдастығының 6-шы аймақтық конференциясын ұйымдас­ты­рушы қазақстандықтарға алғы­сым­ды білдіргім келеді. Халық­ар­а­лық прокурорлар қауымдастығы – прокурорлардың әлемдік деңгейдегі тұңғыш әрі саяси емес бірден-бір ұйымы. Бұл халықаралық қауымдастық әлем про­курорлары үшін басқарудың белгілі стандарттары мен кәсіби этикасын жетілдіруге, заң үстемдігін орнату мен адам құқықтарының шектелмеуін қамтамасыз етуге және қылмыспен бірлесіп күресуді нығайтуға белсенді қатысып келеді. Сабыржан БЕКБОСЫНОВ, Маңғыстау облысының прокуроры: – Әлемнің 140 елінің про­ку­рор­ларын біріктіретін халықаралық қау­ымдастық дүние жүзіндегі беделді ұйымдардың бірі. Осы қауым­дастықтың кезекті конференциясы біздің елде – Астанада өтуі әрине, біз үшін үлкен жетістік. Респуб­ли­каның Бас прокуроры Асхат Дауыл­баев өз сөзінде Қазақстанның әлемдік қауым­дас­тық­қа ықпалдасуы, халықаралық ұйымдармен бірлесе жұмыс істеуі маңызды фактор болып табылатынын айтып өтті. Сондықтан осы форумды өткізудің маңызы зор және еліміз беделінің халықаралық дәрежедегі көрінісі деуге болады. Суреттерді түсірген  Орынбай БАЛМҰРАТ.
Соңғы жаңалықтар

Ақпараттық хабарлама

Егемен Қазақстан • Кеше

Доллар тағы да арзандады

Экономика • Кеше

Ұқсас жаңалықтар