![Деңгейі биік «Дебют»](/article_photo/1499833417_article_b.jpeg)
Бұл байқауға отыздан астам қысқаметражды көркем фильмдердің сценарийлері түссе, олардың ішінен бес жұмыс іріктеліп алынды. Сонымен, шығармашылық-өндірістік бірлестік таңдауы Венера Қайыржанованың «Тығылмақ», Арман Баймұратовтың «Тақия», Ален Рахметалиевтің «Төзім», Берік Жахановтың «Кешірім», сондай-ақ, Ардақ Жылысбаеваның «Жұт» атты сценарийлеріне тоқтады.
Шарт бойынша байқауға жас авторлармен қатар, өз ісінің кәсіби мамандары да қатыса алатын. Байқауға қатысушылардың ішінде Кенжебек Шайқақов, Ғазиз Насыров, Ардақ Жылысбаева және Тимур Мақажанов сияқты байырғы тәжірибелі авторлар да болды.
«Қазақфильм» АҚ Сарапшылар кеңесінің тең төрағасы Бекболат Шекеров байқау қағидасы туралы:
– Бізге жіберілген сценарийлердің ішінен бесеуін іріктеп алдық. Олардың барлығы биыл өндіріске жіберіледі. Төрт туындыға авторлардың өздері режиссерлік етеді. Ал «Жұттың» сценарийін Жандос Еспенбетов есімді жас режиссерге беруді жөн санадық. Мұндай тәжірибе «Дебюттің» тәжірибесінде көптен бері болмаған еді, – деді.
Ал «Қазақфильм» қысқаметражды көркем картиналарды 1959 жылдан бері түсіріп келеді. Бертінде киностудияда «Дебют» шығармашылық-өндірістік бірлестігі құрылып, бүгінде оны Анар Қашағанова басқарады. Біраз жылдардан бері «Дебют» шығармашылық-өндірістік бірлестігі бірқатар сценарийстердің бағын ашып, жас кинематографистердің танылуына мүмкіндік беріп келеді. Бірлестіктің де басты мақсаты – жас кинематографистерді сценарий жазудан бастап, пост-продакшнға дейінгі кино өндірісінің үдерісімен таныстыру.
Айнаш ЕСАЛИ,
«Егемен Қазақстан»
АЛМАТЫ