07 Қазан, 2011

Аудиоспектакльдің тұсауы кесілді

191 рет көрсетілді
Бейбіт заманда қырық жылға созылған ядролық сынақтардың қасіреті Абай елінің тумасы, белгілі жазушы Роллан Сейсенбаевтың назарынан ешқа­шан тыс қалған емес. Осы тақырыпқа арналған оның шығармалары көптеген шетел тілдерінде де жарық көргенін жақсы білеміз. Соның бірі «Дүние тас-талқан болған күн» деп аталады. Жуырда Семейдегі «Достық» үйінде жазушы­ның аталмыш хикаясы бойынша жасалған аудио­спектакльдің тұсаукесер рәсімі өткізілді. Оған осындағы «Бокер» деп аталатын еврей ұлттық мәдени орталығы, «Жаңа шығармашылық» деп ата­латын жастардың қоғамдық бірлестігі мен «Альфа-Марино» жарнама-ақпарат агенттігі мұ­рындық болды. Ел тәуелсіздігі мен Елбасы Жар­лығымен Семей атом полигонының жабылғанына 20 жыл толуына орай ұйымдастырылған игі шараға семейліктер көптеп жиналды. Аудиоспектакль таспасы енді зағиптар қоғамына жіберілмек. Осындай игілікті шаралар басқа азаматтардың тарапынан да зор қолдау тауып жатқаны қуантады. Айталық, жастар мен балалар қауымдастығы және көңілді тапқырлар клубы мүгедек балаларға арналған қайырымдылық марафонын өткізді. Акция соңында әлгіндей жандарға ақшалай және басқа да қайырымдылық көмек көрсетілді. Мұндай игі шаралардан қала кәсіпкерлері де сырт қалып отырған жоқ. Сонымен бірге ауылдағы шаруа қожалықтары да ядролық сынақ зардаптарын басынан өткізген жарымжан жандарға қол ұшын беріп, оларды отын-су, малдарына қажет жем-шөппен қамтамасыз етуге көмектесуде. Көп түкірсе көл демекші, осындай береке-бірлікке не жетсін! Ал күні кеше ғана Семей мемлекеттік университетінде «Ядролық қарудан құтылғанымызға 20 жыл» деген тақырыппен конференция өткізілді. Дәулет СЕЙСЕНҰЛЫ, Семей.
Соңғы жаңалықтар

Доллар бағамы қайта өсті

Қаржы • Бүгін, 16:12

Ұқсас жаңалықтар