Көп пікірінің көмегі көп

Кеше елордада Бейбітшілік және келісім сарайында ТМД мемлекеттері жолшыларының үкіметаралық кеңесінің ХХХІІ отырысы болып өтті. Оны еліміздің Көлік және коммуникация ми­нистрі Берік Камалиев жүргізіп отырды. Астанаға атбасын ті­реген әріптестерін құттықтаған ведомство басшысы оларға Премьер-Министр Кәрім Мәсімовтің құттықтау хатын оқып берді. Бұл басқосуда ТМД елдерінің жол шаруашылығының нормативтік базасын жетілдіру мәселе­ле­рі талқыланып, ТМД халық­ара­лық автомобиль жолдары және олардың шекаралас мемлекеттер шекараларына келуін да­мы­ту туралы хаттаманы іске асы­ру нәтижелері қаралды. Сондай-ақ, ассоциацияланған кеңес мү­ше­леріне инновациялық техноло­гия­ларды енгізу мәселесі қарал­ды. Бұл мәселені талқылау бары­сында ТМД елдерінде маман­дан­дырылған семинарлар мен көр­ме­лер өткізу кезінде иннова­ция­лық шешімдерді кең және тиімді ұсынуды қамтамасыз етілуі белгіленді. Аталған үкіметаралық сала­лық органның басты мақсаты – жалпы қолданыстағы автомобиль жолдары желісін дамыту мен жетілдіру, жол ұйымдарының өн­діріс­тік және ғылыми-техни­калық әлеуетін толық пайдалану үшін жағдайлар жасауға саяды. Сонымен қатар, келісілген жол саясатын жүргізудегі үкіметтің күш-жігеріне, интеграциялық үр­діс­тердің тереңдеуіне және кадр­ларды даярлау деңгейін көтеруге қолдау көрсету болып табылады. Мұнан кейін жолшылардың үкі­мет­аралық кеңесі «Халықаралық көлік дәліздерінің инновациялық дамуы» тақырыбында халықара­лық ғылыми-тәжірибелік конфе­рен­циясымен өз жалғасын тапты. Биылғы жылы ТМД-ның 20 жылдығын тойлауға байланысты кеңес осы оқиғаға арналған бір­қа­тар іс-шаралар өткізуді назарда ұстаған. Оның ішінде, қазіргі күні Астанадағы «Көрме» көр­мелер кешенінде өтіп жатқан VIII «ҚазАвтожол-2011» халықаралық көрмесі бар. Сонымен бірге айтулы датаға орай алдағы уа­қыт­та II «Жол» халықаралық ма­мандандырылған көрме-форум (Мәскеу), «Тәуелсіз Мемлекеттер Достастығына 20 жыл» атты ха­лықаралық ғылыми-тәжірибелік конференция (Минск) және ТМД мемлекеттеріндегі «ТМД апта­сы» іс-шараларын өткізу жоспарланған. Әбдірахман ҚЫДЫРБЕК.