Түркияның Қазақстандағы Төтенше және өкілетті елшісі, дипломатиялық корпус өкілдері мен шетелдік және қазақстандық БАҚ қызметкерлері қатысқан жиында бауырлас елдер арасында орнаған берік сенім мен қос мемлекет басшыларының терең әріптестігі кеңінен сөз болды.
Басқосу барысында Түркия елшісі Невзат Уянык өткен жылдың шілдесінде орын алған өз еліндегі келеңсіздіктен кейін Түркияға шет мемлекеттер басшыларының арасында бірінші болып Президент Н.Назарбаев ат басын бұрғанын ерекше атап өтті.
«Түркияда болған төңкеріс әрекетінен кейін біздің елімізге мемлекет басшысы деңгейіндегі алғашқы сапарды Қазақстан Республикасының Президенті Нұрсұлтан Назарбаев жасады. Түркия мемлекеті мен түрік халқы Президент Н.Назарбаевтың бауырлас ел Қазақстанның көрсеткен тілектестігін ешқашан ұмытпайды. Сондай-ақ, біз мұндай ақ адал ниеттестік пен ізгі әрекетке әрқашан құрметпен қараймыз», деді ол.
Естеріңізге сала кетейік, 2016 жылдың 15 шілдесінде болған оқиғалар, Түркия демократиялық жүйесі мен конституциялық құрылымына қарсы төңкеріс жасау әрекеті еді. Оқиға салдарынан 250 бейбіт азамат шейіт болып, 2 195 кісі жараланды.
Нұрлыбек ДОСЫБАЙ,
«Егемен Қазақстан»
