Көрмеге Кариб аймағындағы 12 мемлекет көрнекі бұйымдарын әкелген. Барлығы бір жерге топтастырылып, көпшілік назарына ұсынылды. Солтүстік және Оңтүстік Америка құрлығының арасында орналасқан Ямайка, Барбадос, Суринам, Гаити сынды елдер үшін дүниежүзілік ЭКСПО көрмесіне келудің өзі зор мәртебе. Себебі, жер аумағы шағын бұл мемлекеттерді әлем кеңірек біле бермейді. Сондықтан осындай жаһандық жиындар арқылы тарихи-мәдени ерекшеліктері паш етіледі.
Салтанатты рәсімге Қазақстан Республикасы Сыртқы істер министрінің орынбасары Ержан Ашықбаев, Гренаданың Денсаулық сақтау, қорғау және халықаралық бизнес министрі Николас Стиль және халықаралық ұйымдар өкілдері қатысты. Онда Е.Ашықбаев Кариб қоғамдастығы ұлттық күнінің мерекеленуіне қатысу зор мәртебе екендігін айтып, қоғамдастық делегациясына Қазақстан үкіметінің сәлемін жеткізді. «Біз – посткеңестік және Шығыс елдері ішінде осындай ғаламдық деңгейдегі 115 мемлекет пен 22 халықаралық ұйым қатысқан халықаралық көрмені ұйымдастырған алғашқы елміз. Бұл – мамандандырылған ЭКСПО көрмелері тарихындағы қатысушылар саны бойынша ең жоғарғы көрсеткіш», деген Сыртқы істер министрінің орынбасары еліміздің мұнай мен газдың мол қорына ие бола тұра, «жасыл» экономиканы дамытуға баса мән беретінін алға тарты.
«Экологиялық теңестірілген және ұдайы дамуға баса назар аударған Қазақстан үшін «Болашақ энергиясы» тақырыбы өте маңызды. Көмірсутекті қорларының бар болғандығына қарамастан еліміз 2050 жылы жалпы электр қуатын өндірудің жартысына дейін жеткізуге мүмкіндік беретін жаңғыртылатын энергия көздеріне белсенді ауысуда. Аталған мақсат біздің 2050 жылға дейінгі стратегиямызда және «жасыл» экономикаға көшу тұжырымдамамызда да бекітіліп отыр», деді Е.Ашықбаев.
Кариб қоғамдастығына мүше Гренаданың денсаулық сақтау, қорғау және халықаралық бизнес министрі Николас Стиль ЭКСПО-2017 халықаралық көрмесіне қатысуға мүмкіндік берген Қазақстанға алғысын білдірді. «Құрамына 15 ел кіретін Кариб қоғамдастығы, шамамен 14 миллион халқы бар шағын өңір. ЭКСПО-2017 көрмесіне КАРИКОМ-нан 12 ел қатысуда. Қазақстан үкіметіне осы маңызды шараға қатысу мүмкіндік бергені үшін алғысымыз шексіз. Бұл бізді халықаралық көрмеде таныстыруға мүмкіндік берді», деді ол.
Н.Стиль қоғамдастық кеңістігінің ерекшелігін де атап өтті. «Павильонымыз – көрмедегі жалғыз бірлескен павильон. Ол сонысымен ерекшеленеді. Соңғы 17 жыл ішінде біз осындай шараларға бірлесіп қатысып келеміз. Бұл Кариб қоғамдастығына мүше мемлекеттердің бірлігін дәлелдейді», деп түйіндеді сөзін Гренаданың денсаулық сақтау, қорғау және халықаралық бизнес министрі.
Шараның ресми бөлігі аяқталған соң, Кариб қоғамдастығына мүше Гренададан келген әртістер қазақстандықтар мен көрме қонақтарының алдында ән айтып, өнерлерін көрсетті.
Кариб аймағы тек шикізат түрлерін тасымалдаумен айналысады, табиғи қазба байлық өндірмейді. Есесіне, туризм саласы кең құлаш жайған. Бұл елдер электр энергиясын қымбат бағада сатып алатындықтан, баламалы қуат көзіне көшуді межелі мақсат санайды. Ол үшін кейбір ауылдық мекендеріне күн панельдерін орнатып, жел электр стансаларын іске қосқан.
