Сала мамандарының айтуынша, биыл шетелден 100 млрд теңге көлемінде инвестиция тарту жоспарланып отыр. Ал, Польша делегациясын бастап келген экономика және даму министрінің орынбасары Ядвига Эмилевич елордада кәсібін сәтті игеріп отырған шетелдік компаниялардың аяқ алысын зерделеді. Польшалық инвесторлар Астанада бизнес жүргізудің тиімділігіне көз жеткізді.
«Польша елі бірқатар салаларда дамыған ел екені белгілі. Біз әлем бойынша жиһаз өндіруден алтыншы орында тұрмыз. Бүгін Астанаға польшалық кәсіпкерлерді әкеліп, оларды қызықтыратын салаларды көрсеттік. Атап айтсақ, құрылыс саласындағы химия өнеркәсібі зауыттарын Қазақстанда көптеп ашқымыз келеді. Менің ойымша, біз өндіретін тауарлар жергілікті тұтынушылардың көңілінен шығады. Сондай-ақ, Астанада фармацевтикалық фабрикалар мен темір жол вагондарын құрастыру зауытын ашу жоспарда бар. Бұл жерде біздің жергілікті кәсіпкерлер үшін қолайлы жағдай жасалады деген сенімдемін», дейді Ядвига Эмилевич.
