![Жәшіктер толғанын өздері «хабарлайды»](/article_photo/1500272215_article_b.jpeg)
Мұндағы қоқыс жәшіктерінің ерекшеліктері бар. Мысалы, кейбірі күннен қуат алып, қоқысқа лық толған кезде арнайы басқару тетігіне хабар береді. Қалдыққа толған 100 литрлік контейнердің дорбасы күніне бірнеше мәрте ауыстырылады екен. Көрме алаңында мұндай жәшіктердің 4 түрі қойылған. Барлығы 3 бөліктен тұрады. Ал оған таңнан кешке дейін арнайы жұмысшылар жауап береді. «Мен күнделікті сағат 08:30-да жұмыс орнымда боламын. Киімімді ауыстырып алған соң, жұмысқа кірісеміз. Қоқыс жәшігі үш бөлікке бөлініп, үш тілде жазылып-көрсетілген. Қағаз, пластик және түрлі қоқыстар», дейді тазалыққа жауапты жұмысшы Руслан Асылбеков.
Көрме аумағындағы тазалықты сақтау үшін арнайы қалдық басқару жүйесі құрылған. Яғни, қоқыс контейнерінен бастап жүк көлігіне дейін бір тетікпен басқарылады. Бас операциялық орталықта орналасқан пультке хабар жеткен соң, жиналған қалдықтар тиісті орындарға жеткізіліп, қатталады. Олардың кейбірі қайта өңдеуге жіберіледі. Сервистік қамтамасыз ету департаментінің директоры Диас Әзбергеновтің айтуынша, көрме алаңынан шығарылатын қоқыстар қатталған соң, қалалық полигонга жіберіледі. Ал қағаз және пластик қоқыстар қайта өңдеуге бағытталады. «Қалашықта тазалық толық сақталған. Осылайша, тазалық мәдениетін қалыптастырудамыз. Көрме аумағына 1600-ден астам қоқыс жәшігі мен қаттама контейнері қойылған. Күніне бірнеше мыңдаған адам кіріп-шығатын шағын аумақтың тазалығы, тіпті еріктілердің де назарында», дейді ол.