![081011-12](http://old.egemen.kz/2011img/081011-12.jpg)
Баку төрінде кездесулер қызықты және тартысты өтіп жатыр. Кеше боксшылар әлем чемпионатының жартылай финалында күш сынасты. Бұл айқастар түскі және кешкі бағдарламаға бөлініп, әдеттегідей екі рингте емес, енді бір ғана шаршы алаңда өтті. Осы жолдарды жазып отырғанда бізге ең жеңіл салмақтағы екі кездесудің ғана нәтижесі белгілі болды. Біріншісінде Олимпиада мен әлемнің екі дүркін чемпионы қытайлық Зоу Шимин ресейлік Давид Айрапетянды ұтты. Екінші кездесуде Азия чемпионы, әлем чемпионатының қола жүлдегері кореялық Жонг Шин моңғолиялық әлем чемпионы Сердамба Пуревдорждан айласын асырды.
Осы төрт боксшының бәрі бір-бірімен кездесіп жүрген боксшылар. Миланда өткен соңғы әлем чемпионатында да осы боксшылардың кездескені есімізде. Сол кезде ресейлік Айрапетянның финалда моңғол боксшысына қалай есе жібергені күні бүгінге дейін көз алдымызда. Енді олардың жолы биылғы сында түйіспесе де, екеуі де финалға барар жолда қарсыластарынан ұтылуға мәжбүр болды.
Кеше басқа елдердің боксшыларынан – Украинадан төртеу, Кубадан үшеу, Англия, Бразилия, Өзбекстан, Италиядан екі-екі боксшыдан рингке шықса, АҚШ, Ирландия, Тәжікстан, Моңғолия, Беларусь, Латвия, Үндістан, Германиядан бір-бір адамнан қолғап түйістірді. Ал Ресейден Айрапетяннан басқа Миша Алоян мен Егор Мехонцев, Қытайдан Зоу Шиминнен басқа Уануан Уанг кездесу өткізді. Ал алаң иелерінен биыл екі боксшы жартылай финалға шығып отыр. Соның бірі аса ауыр салмақтағы Магомедрасул Меджидов біздің Иван Дычкомен кешкі бағдарламада кездесті. Әзербайжан ширек финалда Кубаның алыбы атақты Феликс Савонның жиені Эрисланди Савонды үш раундта үш рет нокдаунға жіберіп, келесі айналымға шыққан болатын. Осы күні Әзербайжанның тағы бір үміті 91 килодағы Теймур Маммадов қытай Уануан Уангпен айқасты.
Биыл Бразилия құрамасы да жақсы бокс көрсетуде. Олар да алаң иелері сияқты екі боксшысын жартылай финалға шығарды. Әлем чемпионатында осы бразилиялықтар туралы біздің бапкерлер «Алматыда жарысқа келер алдында бізден боксты үйреніп еді, енді көрдің бе, өзіміздің басымызға таяқ болып тиіп жатыр», деп қалжыңдап қояды. Әр қалжыңның астарында шындық бар демекші, латынамерикалықтар биылғы сындағыдай қарқындарын сақтаса, Лондон Олимпиадасында қай ел боксшыларына болса да күтпеген сый жасауы әбден мүмкін.
Кеше кешкісін жартылай финалда Ғани Жайлауов кубалық Иасниер Толедомен, Серік Сәпиев латвиялық Эгидиус Кавалайаускаспен, Әділбек Ниязымбетов өзбек Эльшод Расуловпен және аса ауыр салмақтағы Иван Дычко әзербайжан Магомедрасул Меджиевпен кездесті. Ә.Ниязымбетов пен С.Сәпиев финалға шықса, Ғ.Жайлауов пен И.Дычко қарсыластарынан жеңіліп, қола жүлдеге ие болды.
Дастан КЕНЖАЛИН – Бакуден.