«Өңірден осы күнге дейін оның 2 мыңнан астамы жеткіншекті күллі әлем көз тіккен көрмеге әкеліп үлгердік. Ал қалғаны қыркүйек айына дейін Астананы және ЭКСПО-ны тамашалайтын болады.
Саяхаттың алғашқы күнін көрменің басты нысаны «Нұр әлем» павильонынан бастадық. Кейін шет мемлекеттердің павильонын аралаймыз. Жоспарға сәйкес, оқушылармен ЭКСПО-2017 көрмесінде екі күн боламыз», дейді Оңтүстік Қазақстан облыстық білім басқармасы ұйымдастыру бөлімінің басшысы Ердос Нышанов. Ол жасөспірімдердің жол шығынын мемлекет пен демеушілер тарапы көтеретіндігін жеткізді. Облыста 15 аудан болса, ондағы демеушілер қайырымдылық шарасына белсенді атсалысуда.
«ЭКСПО-2017 көрмесін тамашалау үшін өңірдегі әлеуметтік аз қамтылған отбасындағы балалар мен оқуда озат, қоғамдық жұмыстарға белсене қатысқан әрі білімі мен өнегелі тәрбиесі бар оқушыларға арнайы жолдама берілді. Осындай жолмен оқушыларды іріктеп алдық», дейді Ердос Нышанов. Оның айтуынша, оңтүстіктің оқушылары елордаға он автобуспен келген. Әр автобуста бір дәрігерден бар. Олар кез келген уақытта медициналық көмек көрсетуге дайын.
«Мен Оңтүстік Қазақстан облысы Түлкібас ауданындағы Сәкен Сейфуллин атындағы №15 орта мектепте оқимын. Биыл 10-сыныпты бітіріп, 11-сыныпқа өттім. Менің арманым бас қаламызда өтіп жатқан ЭКСПО-2017 көрмесін тамашалау болатын. Бүгін сол арманым орындалды. Мен өте қуаныштымын. Біз өз саяхатымызды «Нұр әлем» павильонынан бастадық», деді саяхатшы Әйгерім Құралбек.
