Сессияда еліміз 2018-2019 жылдарға Кодекс Алиментариус комиссиясының Еуропа бойынша БҰҰ жанындағы Азық-түлік және ауыл шаруашылығы мен Дүниежүзілік денсаулық сақтау ұйымдары (БҰҰ ААҰ/ДДҰ) Үйлестіруші комитетінің төрағасы болып тағайындалды.
Қазақстан құрамына Еуропа аумағы мен Орталық Азияны қоса алғанда 52 мемлекет кіретін ААҰ/ДДҰ-ның Үйлестіруші комитетіне 2003 жылдан бастап мүше болып табылады.
Жалпы, Кодекс Алиментариус комиссиясының негізгі миссиясы тамақ өнімдерінің қауіпсіздігін және әлемдік деңгейде адал сауданы қамтамасыз ету, тамақ өнімдеріне арналған халықаралық стандарттарды және тағам қауіпсіздігін қамтамасыз етудің басшылыққа алынатын қағидаттарын әзірлеу болып табылады.
Еуропа бойынша ААҰ/ДДҰ-ның Үйлестіруші комитетіне төрағалық ету Қазақстанға Экономикалық ынтымақтастық және даму ұйымы (ЭЫДҰ) елдерінің тәжірибесі бойынша тағам қауіпсіздігін қамтамасыз ету үшін ұлттық стратегияны тиімді іске асыруға, бизнесті қолайлы жүргізу үшін тағам стандарттарын үйлестіруге және қолдануға, елдің экспорттық әлеуетін арттыруға, отандық өнімдерді әлемдік нарыққа жылжытуға және халықаралық ғаламдық экономикаға интеграциялануға мүмкіндік береді.
Айта кету керек, 50 жылдан астам уақыт ішінде Кодекстің мүше елдері халықаралық нарықтарда іске асырылатын тамақ өнімдерінің стандарттарын келісу бойынша жұмыстар жүргізуде. Бұл стандарттар тұтынушылардың қауіпсіздігін, қоғамдық денсаулық сақтау саласын жақсартуға, елдер арасындағы артық сауда кедергілерін қысқартуға, мемлекеттерге Кодекс стандарттарымен кепілдік берілген сапалы және қауіпсіз тағам өнімін сатып алуға жол ашады.
Еске сала кетсек, Кодекс Алиментариус комиссиясы БҰҰ Азық-түлік және ауыл шаруашылығы ұйымы мен Дүниежүзілік денсаулық сақтау ұйымының бірлескен үкіметаралық органы болып табылады. Ол әлемнің 7 географиялық аймағынан 188 мүше елді қамтиды.
«Егемен-ақпарат»