БҚО жолаушылар көлігі және автомобиль жолдары басқармасының басшысы Миржан Сатқановтың айтуынша, осы қаржыға 126 км жол жөнделмекші. Атап айтқанда, Чапаев-Жаңақала-Сайқын және Орал-Кирсанов бағытындағы жолдар ретке келтірілуде. Сол секілді Барбастау-Ақжайық-Индер жолының 0-43 шақырым аралығы да жөнделуде. Күрделі жөнделетін Үлкен Шаған-Переметный-Вечный жолының маңыздылығы сол, ол республикалық Орал-Атырау және Орал-Тасқала-РФ шекарасы жолдарын жалғайды.
Биыл сондай-ақ республикалық маңызы бар жолдарды жөндеу мен ұстауға 15 млрд астам теңге қаралды. Бұл қаржыға Орал-Тасқала-РФ шекарасы (4-104 км, соның 54 шақырымы), Чапаев-Жалпақтал-Қазталов-РФ шекарасы (97-157 км,12,63 шақырымы), Қазталов-Жәнібек-РФ шекарасы, Самара-Шымкент - (490-526 км, 36 шақырымы), Орал-Атырау ( 27-108 км, 81 шақырымы) жөнделмекші.
Еске сала кетейік, өңірдегі автомобиль жолдарының жалпы ұзындығы 6530,1 шақырым болса, соның 1392,55 шақырымы - республикалық, 5137,55 шақырымы - облыстық және аудандық маңызы бар жолдар. Биыл осы жолдардың барлығы 500 шақырымын жөндеу көзделуде.
