Археологиялық бөлімде академик Әлкей Марғұланның 1952 жылы жасаған экпедициясында табылған Беғазы-Дәндібай мәдениеті заманындағы заттарды көруге болады. Экспозицияға ыдыстар, еңбек құралдары және оқтардың ұштары қойылған. Сондай-ақ, құнды жәдігерлердің қатарында тұрмыстық заттар да бар. Олардың ішінде бір қаралығы жартылай қымбат тастармен және жезбен қапталған ер тоқым болды.
– Бұл тоқым қолдан жасалған. Өздеріңіз көріп тұрғандай, ол сәл қажалған. Демек жиі қолданылған, – дейді облыстық өлкетану мұражайының директоры Ержан Нұрмағамбетов. – Мұндай ер тоқымдар тек дәулетті ақсүйектерге ғана тиесілі болған. Оны үздік, танымал шеберлерге ғана тапсырыс берген.
Көрмедегі «Алаш» партиясы хаттарының, бұйрықтарының және құжаттарының көшірмелері арасында партияның жиналыстары туралы хабарландырулардан бастап, «Алашорда» қозғалысының көшбасшыларына, оның ішінде Әлихан Бөкейханға да қатысты жарияланған үкімдер мен жазалар да бар.
– Ең маңызды құжатты атап өту қиын, – дейді мұражай директоры. – Маңдайша жазулар да, қазалы қағаздар да бар. Алайда олардың тарихи маңыздылығы азаймайды. Бұл құжаттар тәуелсіздік алған соң көпшілік назарына ұсынылған, оған дейін мұрағаттарда «өте құпия» грифімен сақталған.
Сонымен қатар, облыстық мұражайға Ақтоғай ауданында өмір сүретін жануарлардың тұлыптары мен Қазақстанның еңбек сіңірген мәдениет қайраткері Сахи Романовтың суреттері де қойылған.
Мирас АСАН,
«Егемен Қазақстан»
Қарағанды облысы